Qanday shirinliklar sevib iste'mol qilinadi? Albatta uy sharoitida, o'z qo'lingiz bilan tayyorlangan shirinliklardir. Oila a'zolaringiz va do'stlar davrasida choy yoki qaxva ichib, suhbatlashish juda ham maroqli. Ayniqsa, choyga qo'shimcha sifatida xonadon bekasi o'z qo'li bilan tayyorlagan shirinliklar bo'lsa bormi? Bu maqtovga sazovordir. E'tiboringizga esa nozik va juda ham mazali, tayyorlagan zahotingizni o'zidayoq g'oyib bo'lib qoluvchi shirinlik retseptini taqdim etaman.
Kerakli masalliqlar:
- 125 gramm saryog'
- 110 gramm shakar
- 120 gramm bodom uni
- 4 osh qoshiq djem (yoki quyuq murabbo)
- 1/2 choy qoshiq vanilin
- 1 dona tuxum
- 1/2 choy qoshiq qabartma
Tayyorlash usuli:
1. Saryog'ni xona haroratida yumshatib oling. Yumshatilgan saryog'ni chuqur idishda, shakar, vanilin va bodom uni bilan aralashtiring. Mikser yordamida ko'pirtiring.
2. Un-qabartma aralashmasi va tuxumni soling.
3. Yumshoq xamir qoring. Tayyorlangan xamirni 30 daqiqaga muzlatgichga qo'ying.
4. Pishirish qolipiga pergament qog'ozi to'shang. Xamirdan osh qoshiqda olib, yumaloq shakl bering. Pishirish qolipiga tering.
5. Yog'och qoshiq yordamida xamir ustida yumaloq chuqurchalar qoldiring. Huddi gul kabi.
6. Har bir chuqurchaga djem yoki murabbodan soling. Har xil rangdagi murabbodan foydalansangiz bu pechenyaga yanada o'zgacha go'zallik bag'ishlaydi. 180 darajada qizdirilgan pechda, 15 daqiqa davomida pishiring.
7. Pechenyalarni butunlay qolipda sovuting. Pechenya tayyor!
Yoqimli ishtaxa!