Түс атаулары сонша көп емес. Басты төрт түс (қызыл, сары, жасыл, көк) пен ахромат әрі пәлсапалық мазмұнға қанық - ақ пен қараны білеміз. Қалған түстер осылардың туындысы. Техникалық тұрғыдан - қызыл, жасыл, көк түстерді түрлі мөлшерде араластырып (RGB), кез келген түсті шығаруға болады.
Түс - электромагниттік сәуле. Ал оның атаулары - субъективті. Арайды «қып-қызыл» дейтіндер бар. Басқаның ауылынан ататын арай ақшыл сары болса да. Бояудың атаулары жетпейтін жерде балама келтіреміз. «Меруерттей тістерің», «жақұттай көздерің», әләуләйлім, әләуләй.
Біраздан бері «желіні жарып жүрген» кроссовканың түсі қандай?
Reddit сияқты желілерден тарап кететін осындай басқатырғыштардың көбінің проблемасы - оқырмандардың сөз ұқпауында. Бұл енді, жалпыадамзаттық проблема ғой, қарап тұрсақ.
Себебі, аяқ киімнің түсін сұраса да, жұрт бауларының, табаны мен өрнектерінің түсін айтып кеткен. Неге екені белгісіз, оның ішінде өзім де бармын.
Енді қызық: «мына аяқ киімнің түсі қандай?» десе, мен сияқтылар «бирюза» деп, бауларының түсін айтып тұрады. Ал сұрақты тура түсінгендер сұр аяқ киімді басқалар неге «бирюза» деп отырғанына күйіп піседі. Меніңiе, сұрақтың танымалдығын оталдырып жіберген - түстерді түрлі қабылдау қабілеті емес, дәл осы, сөз түсінбеуде жатыр.
Дегенмен, кроссовканың түсіне оралсақ.
HTML Color Codes сервисі кроссовканың бір нүктесінен коды #95A6A2 болатын түс көрсетті:
Color-Hex сервисі болса, #95A6A2 түсі туралы былай дейді :
«...Бұл түсте негізінен ЖАСЫЛ басым».
Адамның көзі 10 млн түсті айыра алады дейді. Олардың әрі кетсе мыңына атау қойған шығармыз (апельсин түстес, қою сүт, т.с.с.). Ал мына кроссовканың түсінің аты жоқ па деймін. Болса да, сирек атау шығар.
Бұған, кроссовканың фотосын қараған жабдықтардың әрқилы екенін қосыңыз. LCD/TFT/OLED дисплейлердің көзді алдауы әбден мүмкін. Бұрын кәсіби дизайнерлер соның үшін тек әйнек монитормен (CRT) жұмыс істейтін.
Кроссовка адамзаттың әлі де субъективті пайымдар құшағында жүре тұратынын көрсетті. Өкінішке қарай, болмашыдан - соғыстар мен басқа кикілжің тұтанып кетуіне алауыздық ошағы дайын тұр екен.
Ал тіпті қызығын айтайын. Фасоны дәл осындай қытайлық кроссовка менде де болған. Матасы шынымен, жарыққа құбылып тұратын. Бірақ кезінде мұндай хайптық әлеуеті барын сезбеп едім. Қап.