Bekajonlar uchun xit bo'lgan taomni bugun tayyorladim. Ushbu taomni bilmagan bekaning o'zi bo'lmasa kerak. Biroq, har bir uy bekasining o'ziga xos retsepti mavjud. Shunday ekan sizlarga o'z retseptimni taqdim etishni joiz deb bildim. Ushbu usulda tayyorlangan tovuq go'shti o'zining yoqimli sharbati va mazali ta'mi bilan sizni lol qoldiradi. Taomnomangizdan o'rin oladi degan umiddaman.
Kerakli masalliqlar:
1 dona butun tovuq (tovuq oyoqchalari, qanotlaridan ham foydalanish mumkin)
2 osh qoshiq asal
1 osh qoshiq xantal
1 osh qoshiq soya sousi yoki limon sharbati
1 osh qoshiq o'simlik yog'i
3-4 dona sarimsoq tishchasi
rozmarin va hohishga ko'ra ziravorlar, tuz
Tayyorlash usuli:
1. Butun tovuqni bo'laklarga bo'ling. Yuving va quriting.
2. Marinadni tayyorlashga kirishing. Bir idishga marinad uchun masalliqlarni jamlang. Asal va xantalni soling.
3. Soya sousini quying.
4. O'simlik yog'i va ta'bga ko'ra tuz soling. Bir xil konsistensiyali massa hosil bo'lgunga qadar aralashtiring.
5. Tayyorlangan marinad va tovuq bo'laklarini uchrashtiring va aralashtiring. Marinadga cho'mgan tovuq go'shtini tongga qadar muzlatgichga olib qo'ying. Bordi-yu sizda bunday imkoniyat yo'q bo'lsa, u holda 3 soatga olib qo'ying. Bu vaqt mobaynida ham tovuq go'shti marinadni shimib olishga ulguradi.
6. So'ng, go'sht bo'laklarini pishirish qolipiga terib chiqing. Rozmarin va ziravorlarni, sarimsoq tishchalarini soling. Man ozgina 0,5 stakan suv quydim. Go'sht kuyib qolmasligi uchun.
7. 190 darajada qizdirilgan pechda 50 daqiqa davomida pishiring. Maromiga yetib pishganda, xonadoningizga yoqimli, ishtaxa ochar ifor taralib ketadi. M-m-m-m juda ham mazali!
Yoqimli ishtaxa!