Бүген - шагыйрь, язучы һәм журналист, «Сагышлар да алтын була икән...» (2006), "Йолдызлы чатыр" (2015) исемле җыентыклар авторы Фидаил Мәҗитовның (1984 елның 24 мае) туган көне.
И тымызык август төне,
Фасылларның асыл чагы.
Төнге күктә йолдызлар да
Шаулап чәчәк аткан тагы.
Хуш ис бөрки төнге һава,
Йолдыз исе — томаннарда.
Мин мәңгегә гашыйк булдым
Шул йолдызлы болыннарга.
Йолдызлардан чатыр кордым,
Уртасына элдем айны.
Галәм кунагы булдым мин, —
Онытылды җир һәм кайгы.
Кирәк түгел гарешләре,
Йолдызларым балкыганда.
Киек Каз Юлларын күреп,
Өмет күгем яктырганда.
Калыр идем бу чатырда,
Чакырмаса таң нурлары.
Хыял — бары татлы мизгел,
Ә без исә — Җир уллары.