Елга буйлары ямьле түгел

Авыл халкы бик мәшәкатьле чорга аяк басты. Беренчедән, аның алдында язгы кыр эшләрен уңышлы үткәрү бурычы килеп басса, икенчедән, табигать кышкы йокыдан уянган мәлдә, кичекмәстән, тирә-юньне чистарту, ишегалларын, капка төпләрен, урамнарны тәртипкә китерү сорала.

Шуңа да елның-елында  районда май-апрель айларында  тирә-юньне  чистарту, тазарту икеайлыгы игълан ителә.

Бу эш  кемдер алдында  хисап тоту өчен эшләнми. Ә үзебез яшәгән тирәлектә матурлык, чисталык-пөхтәлек тудыру өчен башкарыла. Җиңү бәйрәме, Сабантуй кебек бәйрәмнәребезне чүп-чарга баткан, берни агартылмаган, буялмаган килеш каршыласак, безне берүәү дә аңламас һәм гафу итмәс.  Халкыбыз элек-электән кунак килер алдыннан итәк-чабуын җыя торган булган. Моның өчен хәзер Яз һәм Хезмәт  бәйрәмебез дә бар. Бые без аны биш көнлек ял көннәре  белән каршылыйбыз.  Алары гына җитмәсә, 9 май - Җиңү бәйрәмен  билгеләп үткәндә өч көн ял итәчәкбез. Шулаен шулай да.

Ләкин  22 апрель көнне ТР Экология һәм табигый ресурслар министрлыгының үзәк территориаль идарәсенең беренче разрядлы белгече Ришат Билалов белән Шәтке авылы урамнарында, елга буйларында рейдта булып  кайтканнан соң авыл халкында да, җирле җитәкчеләрдә дә экологик тәрбия  җитенкерәми дигән фикер калды.  Әлеге җаваплы белгеч тарафыннан җәмәгать урынында яки авыл җирлеге биләмәсендә төзелеш материаллары, кулланыштан төшерелгән иске техника саклаганнары өчен авылның ике шәхси хуҗалыгына административ беркетмә төзелде, ике хуҗалыкка -  җәмәгать урынына көнкүреш калдыклары ташлаганы һәм  рәсмиләштерелмәгән җиргә утын, салам өйгән, төзелеш материаллары саклаган өчен кисәтү ясалды.

Беренчесенә көнкүреш калдыкларын юк итү яки җиргә күмеп кую, икенчесенә  утын, салам һәм төзелеш материалларын  йорт биләмәсенә кертеп өю бурычы куелды.

Тулырак "Теләче" газетасыннан укый аласыз.