Халыҡ-ара башҡорт теле диктантында силәбеләр әүҙем ҡатнашты. Милләттәштәребеҙ өлкәнең 20 ҡала һәм район үҙәктәрендә башҡорт теленән белемен һананы.
Силәбелә диктант ҡаланың дәүләт университетының Шәрҡиәт һәм Евразия факультеты бинаһында үтте. Был уҡыу йорто менән һуңғы осор башҡорт милли ойошмалары тығыҙ эшләй: башҡорт теле уҡытыусылары ултырышы уҙҙы, Зайнулла ишанға арналған уҡыуҙар бында ойоштороу планлаштырылған, башҡорт теле бүлеген асыу ҡаралған. Тап ошо бинала Башҡортостан мәғариф министры Айбулат Хажин эш сәфәре менән булып китте. Юл тапалған бында, ти диктантта ҡатнашыусылар ҙа.
Әйтеп үтергә кәрәк, Силәбе өлкәһендә башҡорт теленән диктант бишенсе тапҡыр үтә. Быға тиклем ул, башлыса Златоуст ҡалаһында уҙғарылып килһә, ике йыл уңайы өлкә кимәленә сыҡты. Хатта Силәбе хәкимиәте иғтибарын йәлеп итте. Төбәк Губернаторы башҡорт теле диктанты проектының тәжрибәһен өйрәнергә тигән ҡарар сығарҙы.
Ә был башланғысты сит телдәр уҡытыусыһы Әлиә Ноғаманова күтәреп сыҡҡайны. Милләттәшебеҙгә Башҡортостан Республикаһының Силәбе өлкәһендәге даими вәкиллеге, Силәбе башҡорттарының гәзите һәм телетапшырыуы «Уралым», өлкә Башҡорт ҡоролтайы, Силәбе йәштәре ойошмаһы әүҙем ярҙам итә.
Диктант имтиған тип түгел, ә байрам булараҡ ҡабул ителде. Сара тамамланғас та, халыҡ таралырға ашыҡманы: үҙ-ара аралашты, хәл-әхүәл белеште, ураҙа тотоусылар киске ашҡа ҡунаҡҡа саҡырышты.
Мәғлүмәт һәм видео «Уралым» телепашырыуы тарафынан әҙерләнде
Международный диктант по башкирскому языку бөтә донъя буйынса 22 меңдән ашыу кеше ҡатнашҡан.