Тинчлик учун шукрона керак
Аллоҳга беадад шукурлар бўлсинки, айни кунларда юртдошларимиз динимизнинг асосий рукнларидан бири бўлган рамазон ойини тинч ва осойишта диёрда, ўз оиласи бағрида кутиб олиш, рўза ибодатларини бажариш бахтига муяссар бўлмоқдалар.
Тинчликнинг нақадар буюк неъмат эканини дунёнинг айрим мамлакатларида содир былаётган воқеаларни кузата туриб, янада теранроқ ҳис этмоқдамиз. Дин ниқоби остида содир этилаётган терактларнинг аянчли оқибатлари, даҳшатли манзаралари мусулмонларнинг қалбидаги энг оғриқли нуқтага айланди. Масалан, шу йил 15 март куни Янги Зелландиянинг Крайстчерч шахрида жойлашган бир вақтнинг ўзида иккита масжидда юз берган теракт яқин 50 мусулмонни ҳалок қилди, шунча одам жароҳатланди. Бутун дунё аҳли бу фожианинг оғриқларини ҳали унутолгани йўқ.
Албатта, бу воқеликларни таҳлил этар эканмиз, тинчликни сақлаш, осойишталикни таъминлаш осон кечмаётганини, бу заҳматли, оғир ва машаққатли бурчни бажариш учун фидойи касб эгалари тунларни бедор ўтказаётганини ўйлаб кўришимиз керакка ўхшайди. Ана шу воқеалардан хулоса чиқарадиган бўлсак, нима учун масжидларимизда жамоат тартибини сақлашга ички ишлар идоралари ходимларини қўймаслигимиз керак?
Тан олиб айтиш керак, ҳуқуқ тартибот идоралари ходимлари кеча-ю кундуз хушёр, огох булишмаса, жиноятчиликка карши курашишмаса, бугунгидек бахтли ва фаровон щаётга эриша олмаган булар эдик.
Республикамизнинг барча шаҳар ва туманларида, маҳаллаларида Рамазон ойида ўқиладиган таровиҳ намозларини масжидларда ўқимоқдалар. Уларнинг ибодат қилишлари учун яратилган шарт-шароитларни кўриб ҳавасингиз келади. Маърифий суҳбатлар, қуръон тиловатидан кўнгиллари нурафшон бўлиб қайтаётган мусулмонларнинг қалбида ҳам шундай озод ва обод юртда яшаётганларига шукроналик мужассам.
Лекин орамизда шундай тоифадаги инсонлар борки, улар бундай имкониятлардан унумли фойдаланиш ўрнига ўзларини тута билмай, оддий ахлоқ-одоб қоидаларига риоя қилишни ҳам унутиб қўядилар. Масжидлар атрофида эса ҳатто автоуловларини қаерга жойлаштиришни билмай тартибсизликларни юзага келтирадилар.
Ана шундай пайтларда ички ишлар идоралари ходимларисиз жамоат тартибини сақлаш мумкинми? Юртдошларимизнинг эркин ибодат қилишларини таъминлашга ўзларининг катта ҳиссасини қўшадилар. Масжид кириш-чиқиши демай автомобилини беўхшов тўхтатадиганларни инсофга чақириш ҳам шу соҳа ходимлари зиммада эканидан кўз юммайлик.
Баъзи юртдошларимиз масжидга мактабда ўқиётган фарзандини ҳам олиб келмоқда. Тавореҳ намозига келаётган ёш болаларнинг катталар орасида намоз ўқишлари, уч-тўрт соатлаб масжидда қолиб кетишлари албатта, уларнинг толиқиб қолишларига олиб келади. Бу эса уларнинг эртанги куни иаълим олишига салбий таъсир кўрсатишига олиб келади.
Ҳали диний билими бўлмаган ёшларнинг ўзлари моҳиятини тушуниб-тушунмай масжидга боришларидан муддао нима? Ахир қўлига қурол олиб, ўз юртидан, ота-онасидан воз кечаётган айрим ёшларимиз ҳам ўзлари билиб-билмай экстремистик гуруҳларнинг қурбонига айланганлари бизга наҳотки сабоқ бўлмаса? Яширин ҳужраларда чаласавод муллалар ва отинойилар қўлида сабоқ олган болаларимиздан чиқмадими шундай тоифадаги инсонлар?
Ички ишлар ходимларининг шаънига ижтимоий тармоқларда айтилаётган ҳақоратомуз фикрлар адолатдан эмас. Аввало айримлар масала моҳиятига тушунмай муносабат билдиряпти. Бундай ёндашувлар эса осойишталик посбонларига бўлган ишончга соя солади. Айни вақтда ички ишлар идоралари ходимларининг хизмати туфайли ҳаловатда яшаётганимиздан ҳам кўз юммайлик.
Рамазонни тинчлик ойи ҳам дейишади. қалбимиздаги сокинлик, руҳиятдаги хотиржамлик билан шукрона келтирсак фойдадан ҳоли бўлмайди. Хурматли ватандошлар ушбу муқаддас рамазон ойини мусаффо осмон остида хамжиҳадликда, бирдамликда ўтказайлик, зеро айрим бузғунчи кучларнинг тинчлигимизни кўролмай тиш қайраб бир-биримизга қарши қўйишларига, арзимаган нарсалардан баҳона қидириб орамизга нифоқ солишларига имкон яратиб бермайлик. Оллоҳ барчамизни ўз паноҳида асрасин!!!
Muallif: G.Hakimova