Ko`pchilikni bitta savol qiynaydi “Internetda pul topsa bo`ladimi ?”. Lekin hech kim bu yo`l bilan topiladigan rizqning halol yoki haromligiga e`tibor bermaydi. Chala bloggerlar aytganidek “Soqqa kelib tursa, har qanday proektni ishga tushiraman”.
Internetda pul topishga harakat qilar ekanman, rizqning halolligi men uchun birinchi o`rinda turadi.
Bu borada sizlar bilan o`z tajribamni bo`lishmoqchiman. Aldanib, tajribasizlik tufayli harom ishlarga aralashib qolishdan ehtiyot bo`ling.
Internet saytlar, faxsh reklama.
O`z saytingizda biron tovar yoki xizmatni reklama qilayotganda uning nima ekanligiga yaxshilab e`tibor bering.
Saytlar orqali pul ishlashni boshlagan vaqtimda, banner reklamalar orqali daromad olish ommalashgan edi. Eng qizig`i banner tarmoqlari Erotik reklamalar uchun ko`proq haq to`lashardi. Erotik mavzudagi faxsh reklamalar, turli xil bukmeker, totalizator yoki Onlayn qimor o`yinlari saytlarini reklama qilish ham HAROM hisoblanadi.
Yolg`on reklama
Tizer tarmoqlardagi e`tiborni tortadigan reklamalar: O`latni 5 sm ga o`stirish yo`li, 2 kunda ozish, Bu maxsulot rakni keltirib chiqaradi, Toshkentlik qiz sharmanda bo`ldi va h.k h.k
Bu reklamalar ustiga bosgan foydalanuvchi hech qachon "o`latni 5 sm o`stirish yo`li" ni topa olmaydi. Uning o`rniga foydalanuvchiga yana boshqa reklamalar sahifasi ko`rsatiladi.
Umuman olganda, reklama qilinayotgan tovar yoki xizmatning matni uning asliga to`g`ri kelmasa bu yolg`on reklama hisoblanadi. Yolg`on reklamadan sizga keladigan daromad ham HAROM bo`ladi.
Referallar va Moliyaviy piramida
Tarmoqli marketing orqali turli xil proektlarga odamlarni jalb qilish orqali ham pul ishlasa bo`ladi. Lekin, odamlarni jalb qilishdan oldin uning asl faoliyati bilan qiziqib ko`ring. Odamlarni jalb qilishga qaratilgan ko`p proektlarning asl maqsadi – Moliyaviy piramida qurish, odamlarni aldash va pullariga chuv tushirish bo`ladi. Shu sabab, bunday HAROM ishga sherik bo`lib qolmang.
Nakrutka, Hisoblagichlarni sun`iy o`zgartirish
Ko`pchilik yosh adminlar, o`z proektlaridan tezroq pul ishlash uchun daromadga ta`sir etadigan ko`rsatkichlarni sun`iy ravishda o`zgartirishadi. Telegram kanallarda obunachilarni, saytlardagi tashrif buyuruvchilarni, ijtimoiy tarmoqlarda obunachilarni va h.k.
Mening bir tanishim, hozirda telegramda ommalashgan e`lonlar kanalini ochdi. Avvaliga tekinga e`lon joylashtirdi, chunki kanal obunachilari judayam kam edi. Kanalni rivojlanitirish uchun vaqt va pul sarflashni o`rniga, tinchgina nakrutka orqali obunachilarni ko`paytirib qo`ya qoldi. Endi kanalning 40.000 ta obunachisi bor, ulardan 80% i botlar.
E`lon beruvchilar buni bilmagani sabab 10.000 so`mdan bitta e`lonni joylashtirishadi. Sifatsiz xizmat, Nakrutka qilingan kanal e`lon beruvchilar uchun kutilgan natijani bermagandan so`ng, ular bu kanalga qaytib murojaat qilishmaydi.
Eng qizig`i, “Nega kanalda e`lon berish buncha qimmat ?” degan savolga: “40.000 ta obunachisi bor” deb uyalmasdan javob beradi.
Qani aytingchi, bu ham HALOLmi ? Albatta HAROM.
Pul ishlash sxemalari(Keyslar):
Internetda pul topish bo`yicha ish bergan formulalarni – sxemalar(keyslar) deb atashadi. Ular 3 turga bo`linadi:
Oq, Zangori va Qora.
Oq sxema – Hech qanday aldovlarsiz ish bergan pul topish usuli.
Masalan: Telegramda kanal ochish, obunachilarni to`plash va reklama sotish.
Zangori sxema – Bu sxemalarda 50% yolg`on, 50% rost bo`ladi. Foydalanuvchilar tajribasizligi tufayli bu sxema qurbonlariga aylanishadi. Masalan: tizer reklamalari kabi. Unda sizga yo`q narsani reklama qilishadi. Siz esa ishonib unga bosasiz. Natija esa siz o`ylagandek bo`lmaydi.
Qora sxema – 100% yolg`onda qurilgan pul ishlash usuli. Bu sxema qurbonlari osmondagi va`dalarga ishonib pullaridan ayrilishadi.
Masalan: Telegram kanal sotuvga qo`yiladi, lekin sotuvchi kanal admini emas. U haridordan pulni olgan yo`q bo`lib qoladi.
Bukmekerlar, Totalizatorlar va Qimor o`yinlari
Sendan xamr va qimor haqida so‘rarlar. Sen: «Ikkisida katta gunoh va kishilar uchun manfaat bor va gunohlari naflaridan kattadir», deb ayt. Va sendan nimani nafaqa qilishni so‘rarlar. Sen: «Ortiqchasini», deb ayt. Alloh shundoq qilib sizga O‘z oyatlarini bayon qiladi. Shoyadki tafakkur qilsangiz. (Baqara surasi, 219-oyat).
Ko`pchilik bukmeker bu qimor emas, biznes deb o`zini o`zi ishontiradi. Agar Natija sizning harakatingizga bog`liq bo`lmasa – bu qanaqa biznes bo`lishi mumkin ?
Hozirgacha, bukmeker prognozlarini sotadigan O`ZBEK adminlariga tushunmayman. Totalizator va bukmekerlarda o`ynash qimor hisoblanadi. Qimor esa Harom azizlar.
Xulosa:
Internetda halol pul topsa bo'ladimi ? Albatta. Buning uchun odamlarga foydasi tegadigan, ularni ishonchini oqlaydigan va aldamaydigan proektga qo'l urish lozim. Tez daromad olish maqsadida harom ishlarga qo'l urmang. Qo'lingizni ko'ksingizga qo'yingda: Men halol biznes tarafdoriman, deb ayting.