E'tiboringizga vena xalqining sevimli pechenyasi retseptini taqdim etamiz. Nozik va mazali pechenyalar issiq choy va qaxva bilan juda ham ma'qul bo'ladi. Tayyorlanishi esa juda ham oddiy, kerakli masalliqlar esa har bir bekaning oshxonasida mavjud. Dasturxondan o'zining yorqin o'rnini egallovchi ushbu shirinlikni albatta tayyorlang!
Kerakli masalliqlar:
125 gramm yumshatilgan saryog'
50 gramm shakar kukuni
1 dona tuxum oqi
15 gramm kakao kukuni
130 gramm un
Bir chimdim tuz
Tayyorlash usuli:
1. Shakar kukuni va saryog'ni birlashtiring, krem kabi massa hosil bo'lgunga qadar ko'pirtiring.
2. Kakao kukuni va unni birlashtiring, saryog'li massaga soling.
3. Bir xil massa hosil bo'lgunga qadar aralashtiring.
4. Tuxum oqini aloxida idishda tuz bilan birga ko'pirtiring.
5. Ko'pirtirilgan tuxum oqini bir necha qismga bo'lib, saryog'li massaga qo'shing.
6. Pishirish qolipiga pergament qog'ozi yozing. Xamirni maxsus konditer qopchasiga soling va pergament qog'ozi ustidan zig-zag shakl chiqaring.
7. 180 darajada qizdirilgan pechda 10-12 daqiqa davomida pishiring. Tayyor pechenyalarni oshxona panjarasida sovuting. So'ng, qaxva yoki choy bilan dasturxonga tortiq qiling.
Yoqimli ishtaxa!