Mendan ko`pincha “Qanday qilib, ustaomonlarcha hech narsaga ulgura olmaysan ?” deb so`rashadi. Men esa ularga : “Omadimning siri, divanga bo`lgan cheksiz muhabbatim va bekorchilikda” deb javob beraman.
Bugungi maqolam o`z kanaliga ega adminlar uchun. “Bugun kanalga nima yozsam ekan ?” degan savol sizni qiynab yubormadimi ? Javobingiz Ha! bo`lsa, maqola davomini o`qishni maslahat beraman. Aks holda, siz hali ishingizdan zerikmapsiz.
Nega kanallar yopilib ketadi ?
Qanchadan qancha adminlar o`z kanallarini yarim yo`lda yetimlar kabi bo`zlatib tashlab ketishadi. Sababini so`rasangiz – Zerikdim / Foyda bo`lmadi / Pul kelmadi va h.k.
Bu sabablar bir vaqtning o`zida baxona bo`lishi ham mumkin.
Bugun men sizlar bilan unikal uslubni bo`lishmoqchiman. Bu usulni ish faoliyatida qo`llaganingizdan so`ng, sizda “ijodiy uzulish” bo`lmaydi. Kanalga post yozish uchun ilhom kelishini kutib o`tirmaysiz.
Maqsad qo`yishning oltin siri
Bilasizmi, vaqt bilan chegaralangan har qanday orzu – MAQSAD deb ataladi. Ularni hayolda orzu ko`rinishida emas, qog`ozga yozib, unga erishish vaqtini taxminan bo`lsa ham yozib qo`yishingiz – orzu tomon tashlangan birinchi qadam bo`ladi.
Maqsad qo`yishning 4 oltin qoidasi bor:
1 – Maqsad aniq bo`lishi
2 – Vaqt bilan chegaralanishi
3 – Aqlga sig`adigan va erishib bo`ladigan darajada ekanligi
4 – O`z o`zini rag`batlantirish
Masalan:
Men 30-aprelgacha 100.000 so`m ishlamoqchiman – BU NOTO`G`RI!
Kanallar katalogidan mening kanalim mavzusiga aloqador kanallar adminlari bilan muloqotga chiqib, reklama sotish orqali 30-aprelgacha 100.000 so`m ishlamoqchiman. Topgan pulimga yangi soat olaman. – BU TO`G`RI
Birdaniga millionlarni qisqa vaqt ichida topaman deb reja qilib, o`zingizni uruntirib qo`ymang. Chunki, har bir erisha olmagan maqsadingiz miyyada salbiy xotira bo`lib saqlanib qoladi. Bu esa, sizni keyingi yutuqlarga erishishingizda o`zingizga bo`lgan ishonchni pasayishiga olib keladi.
Miyyani aniq reja va harakatlar ketma ketligi bilan ta`minlang. Qolgan ishni u o`zi qiladi. Vazifa bajarilgandan so`ng esa, o`zingizni rag`batlantirish esingizdan chiqmasin.
Reja tuzamiz
Men doim yakshanba kuni keyingi haftada kanalga nashr qilinadigan postlar ro`yhatini tuzib chiqaman. Bu usul menga vaqtimni bekorga sarflashga yo`l qo`ymaydi. Chunki, vaziyat o`z qo`limda ekanligni doim his qilib turaman.
Lekin, ko`pincha…ko`pincha nima qilishim kerakligi esimdan chiqib qoladi. Shu sabab, o`zim uchun WORD dasturida rejalarimni vizuallashtiraman va rasm ko`rinishida telefonimga saqlab qo`yaman. O`zimni bekorchi his qilsam, darxol rasmni ochaman va nima qilishim kerakligi yodimga tushadi.
Mana sizga qisqacha namuna:
Yuqoridagi rasmda men o`z haftalik rejam namunasini aks ettirdim. U yerdagi bo`limlar va ularga aloqador maqolalar nomi yozilgan. Pastida rejadagi vaqtning oxirgi sanasi – Dedlayn. Ya`ni shu kungacha maqola tayyor bo`lishi SHART!.
Xulosa :
Bu usulni nafaqat kanal boshqarish balki, hayotingizni har qanday jabhasida qo`llashingiz mumkin. Hayrli ish yo`lida hayolga kelgan har qanday orzuni amalga oshirish imkoni endi sizda mavjud.
Endi menga aytingchi, Maqsadim aniq, Rejam tayyor bo`lgandan keyin ham ortga chekinamanmi ?