Shirinlikni sevib iste'mol qiluvchilar uchun ushbu tort e'tibordan chetda qolmasligi aniq. Tayyorlangan tort har qanday dasturxondan o'zining yorqin o'rnini egallab, dasturxon davrasida barchaga hushkayfiyat ulashadi.
Kerakli masalliqlar:
Biskvit uchun:
1 dona tuxum
50 gramm shakar
1 osh qoshiq kakao kukuni
1/2 choy qoshiq qabartma
2/3 stakan un
Sufle uchun:
250 gramm smetana
200 ml yogurt
2/3 stakan shakar
15 gramm jelatin
1 upakovka kivili jele
500 gramm qulupnay
Ganash uchun:
100 gramm shokolad
100 ml qaymoq
Tayyorlash usuli:
1. Birinchin navbatda jeleni tayyorlang. Qog'ozida ko'rsatilgan ko'rsatma bo'yicha. Faqat suvni ko'rsatilgan qismini yarmini quying. Idishga solib sovuting.
2. Bu vaqt mobaynida biskvitni tayyorlang. Buning uchun: tuxum va shakarni ko'pirtiring. Kastryulkaga issiq suv quying, tuxumli massani kastryulka ustiga qo'yib, hajmi 3 marotaba ko'paygunga qadar ko'pirtiring (bu jarayonni shunchaki issiq suv ustida bajaring, aslo olovga qo'ya ko'rmang, taxminan 5-6 daqiqa). Ko'pirtirilgan tuxumni kastryulka ustidan oling, un, kakao, qabartma aralashmasini soling va extiyotkorlik bilan bir xil massa hosil bo'lgunga qadar aralashtiring.
3. Diametri 20 sm hajmdagi qolipning tag qismiga pergament qog'ozi yozing. Qolip devorlarini yog' bilan surting. Xamirni quying va qolipni soat strelkasi aylangan kabi bir necha marta aylantiring. Bu biskvit tekis pishishi uchun.
4. 180 darajada qizdirilgan gaz pechida 20 daqiqa davomida pishiring. Tayyor biskvitni ustki tomonini pastga qilgan holda oshxona panjarasida sovuting. So'ng, qolip devorlarini pergament qog'ozi bilan o'rang. Qolipga biskvitni soling.
5. Qulupnayning bir qismini ikki qismga bo'lib, kesilgan qismini tashqi tomonga qaratib, qolip devori bo'ylab terib chiqing. Qolgan qulupnay qismi va tayyorlangan jeleni mayda to'rtburchak shaklda to'rg'ang.
6. Sufleni tayyorlang. Jelatinni 60 ml sovuq suv bilan uyuting va ko'rsatilgan vaqtga qoldiring. So'ng, suv xammomida butunlay erigunga qadar eriting. Smetana, yogurt, shakarni birlashtiring va mikser yordamida hajmi ko'paygunga qadar ko'pirtiring. Avvaliga past tezlikda, keyin yuqori tezlikda ko'pirtiring. Ko'pirtirish jarayoni so'ngida jelatinni nozik oqimda quying, aralashtiring.
7. Tayyorlangan suflega qulupnay va jele bo'laklarini solib, aralashtiring. Sufleni qolipga quying, tekislang va 2 soatga muzlatgichga qo'ying.
8. Belgilangan vaqt o'tib, ganashni tayyorlang. Qaymoqni qaynash darajasiga olib boring, olovdan oling va bo'laklarga bo'lingan shokoladni soling. Bir xil konsistensiya hosil bo'lgunga qadar aralashtiring. Ganashni ozgina sovuting va sufle ustidan quying va tekislang. Qaytadan muzlatgichga butunlay sovutishga qo'ying.
9. Belgilangan vaqt o'tib, tortni qolipdan oling. Tortni hohishingizga ko'ra qulupnay va yalpiz barglari bilan bezating. Mazali desertni issiq choy bilan dasturxonga torting.
Yoqimli ishtaxa!