Ajoyib va universal taom! Bayram va kechki ovqat dasturxonida hech kimning e'tiboridan chetda qolmaydi. Qolaversa ushbu usul bilan pishirilgan go'sht buterbrod va salatlar uchun ham juda ma'qul keladi.
Kerakli masalliqlar:
500 gramm lahm mol go'shti
5 osh qoshiq zaytun yog'i
2 choy qoshiq xantal (gorchitsa)
2 choy qoshiqdan asal va tuz
1 osh qoshiqdan qurigan rayhon, paprika, murch, qizil qalampir
Tayyorlash usuli:
1. Go'shtni yuving va oshxona sochig'i bilan quriting.
2. Tog'orachada zaytun yog'i, asal, xantal va qolgan barcha ziravorlarni birlashtiring.
3. Sanchqi yordamida bir xil massa hosil bo'lgunga qadar aralashtiring.
4. Marinad uchun tayyorlangan aralashmaga go'shtni soling, har tomonlama aralashtiring. Go'sht yanada mazali tayyorlanishi uchun marinadlangan go'shtni tuni bo'yi muzlatgichda saqlash ham mumkin. Bordiyu vaqtingiz tig'iz bo'lsa, marinadlangan go'shtni 1soat davomida xona haroratida ushlab turing.
5. Go'sht bo'lagi hajmini hisobga olgan holda 2 qavat folga qog'ozi yozing. Go'sht bo'lagini qo'yib, zich holda o'rang.
6. Folga qog'oziga o'ralgan go'shtni 180 darajada qizdirilgan gaz pechida 1 soat davomida pishiring. Belgilangan vaqt o'tib, folga qog'ozini extiyotkorlik bilan oching va usti ochiq holda 10 daqiqa davomida pishiring.
7. Tayyorlangan go'shtni har qanday garnir bilan dasturxonga tortish mumkin. Mazali taomni yaqinlaringizga taqdim eting.
Yoqimli ishtaxa!