Ajinlar paydo bo'lmasin desangiz teri parvarishi bilan ilk ajinlar paydo bo'lgan vaqtdan boshlab jiddiy shug'ullanish kerak, deb o'ylovchilar qattiq yanglishishadi. Ularni yo'qotgandan ko'ra, oldini olgan osonroq. Ajinlar odam hayotining uchinchi o'n yilligida boshlanuvchi yosh bilan bog'liq teri so'lishining asorati hisoblanadi. Shuning uchun bu turdagi ko'rinishlarning oldini olish choralarini kechiktirib bo'lmaydi. Yaxshisi, erta boshlanuvchi bu muammodan taranglashtiruvchi va tekislovchi choralarni qo'llash orqali qoching.
Eng ma'qul vositalardan biri issiq kopresslar sanaladi. Ular uxlashga yotishdan 3 soat oldin qo'yiladi. Yuzni muzdek tuzli eritma bilan artish maqsadga muvofiq bo'ladi (yarim choy qoshiq osh tuzi 1 stakan suvda eritiladi). Judayam nozik teri sohibalari tuz o'rniga tanin eritmasidan foydalansa ham bo'ladi (yarim choy qoshiq tanin 1 stakan suvda eritiladi). Uyquga yotishdan oldin yuzga tuzli krem surtish foydali. Agar krem tyubikda bo'lsa, undan ma'lum bir miqdorda olib, qopqog'i yopiladigan kichikroq shisha idishga soling. So'ngra unga 1 choy qoshiq mayda tuz sepib, aralashtiring. Hosil bo'lgan vositani yuz va bo'yin terisiga barmoq uchlari yordamida ishqalang. Bu muolaja 2-3 daqiqa davom etishi lozim.
Ertalablari yuzni o'tlar (mavrak (shalfey), moychechak, lipa guli, qulmoq (xmel) g'uddasi) qaynatmasi yoki damlamasidan tayyorlangan loson bilan arting. Keyin yuzga kunduzgi kremdan va upadan surting. Yuzni krem bilan himoyalamasdan turib ko'chaga chiqish mumkin emas. Har kuni 5 daqiqa davomida yuzga barmoq uchlari yordamida engil urib qo'yish judayam foydali.
Yana yuz va bo'yindagi ajinlarga qarshi niqoblarni ham qo'llasa bo'ladi, masalan: Oqsilli-limonli. 1 dona tuxum oqini yaxshilab ko'pirtirasiz va unga yarim bo'lak limon sharbatini hamda pichoq uchida ozgina tuz qo'shasiz. Hammasini yaxshilab aralashtirib, 15-20 daqiqaga yuzingizga surtasiz. Belgilangan vaqt o'tgach, yuvasiz. Tuxum sarig'i va moy. 1 ta tuxumning sarig'iga 0,5 choy qoshiq kamfarali yoki kanakunjut moyidan qo'shasiz. Hammasini aralashtirib, yuzingizga surtasiz. 15 — 20 daqiqa o'tgach, namlangan paxtali tampon yordamida artib olasiz. Limonli yog'li niqob. 6—7 g yog'li kremni 1 choy qoshiq limon sharbatini tomchilatgan holda aralashtiring va yarim choy qoshiq miqdorida smetana yoki mayonez qo'shing. Hammasini aralashtiring va yuzingizga surting. 20-25 daqiqadan so'ng yuving. Quruq hamda ajinli yuz bo'yin terisiga niqob surtishdan oldin: yuz va bo'yin terisi tozalanadi, keyin krem surtiladi, undan so'ng esa niqob (agar niqob tarkibida krem bor bo'lsa, niqobdan oldin krem surtilmaydi).
