Shokolad va qahva solib tayyorlaniladigan tezpishar tort har qanday dasturxonga ham fayz bag’ishlaydi. Korjlarga hech qanday qiyom quyilmasligiga qaramay, ular juda nam bo’lib pishadi. Nozik va hush ta'mga ega tortni albatta tayyorlang! Sinab ko'rishdan aslo qo'rqmang!
Kerakli masalliqlar:
Xamir uchun:
350 gramm shakar
245 gramm un
75 gramm kakao kukuni
1.5 choy qoshiq qabartma
1.5 choy qoshiq iste'mol sodasi
1/2 choy qoshiq tuz
2 ta tuxum
240 ml yangi damlangan qahva
240 ml sut
120 ml o'simlik yog'i
1.5 choy qoshiq vanilin
Krem uchun:
180 gramm qora shokolad
226 gramm yumshatilgan saryog'
230 gramm shakar upasi
1.5 choy qoshiq vanilin⠀
Tayyorlash usuli:
1. Tog'orachaga barcha quruq masalliqlar: un, tuz, shakar, kakao, qabartma va iste'mol sodasini birlashtiring.
⠀
2. Alohida idishga esa tuxum, qahva, sut, yog' va vanilinni soling. Mikser yordamida ko'pirtiring.
⠀
3. Quruq massa va suyuq aralashmani birlashtiring. Natijada silliq, suyuqroq holatli xamir tayyor bo'lishi lozim.
⠀
4. Pechni 180 C darajaga qizdirishga qo'ying. Aylanasi 22-24 sm li qolipga sariyog'dan surting, va ostiga pergament qog'ozi yozing.
⠀
5. Xamirni ikki qismga bo'lib, 25-30 daqiqadan pishiring. Korj pishganligini gugurt cho'pi yordamida tekshiring, quruq chiqsa pishgan hisoblanadi.
⠀
6. Korjlarni pech panjarasida butunlay sovuting.
⠀
7. Bu vaqt mobaynida kremni tayyorlang. Shokoladni suv xammomida eriting.
⠀
8. Sariyog'ni mikser yordamida ko'pirtiring. So'ng, shakar upasini solib, oqarib shishgunga qadar yaxshilab ko'pirtiring.
⠀
9. Vanilin shakari va eritilgan shokoladni solib, past bosimda ko'pirtiring. So'ng, quvvatini oxirigacha ko'tarib, 2-3 daqiqa davomida ko'pirtiring.
⠀
10. Tort tayyorlanadigan idishga korjni ni bittasini qo'yib, ustidan kremning bir qismini surting. Ikkinchi korj qavati bilan yopib, usti va chetlariga qolgan krem qismini surting. Hohishingizga ko'ra, kremni pishiriq qopchasiga quyib, har xil gullar chiqarish ham mumkin.
⠀
11. Tortni bir soatga muzlatgichga olib qo'ying. Belgilangan vaqt o'tib, mazali tort ustini hohishingizga ko'ra o'rmon mevalari (malina, chernika, golubika) bilan bezating.
⠀
Yoqimli ishtaha!