«Манчестер Юнайтед» бош мураббийи Оле-Гуннар Сульшердан «Реал» яримҳимоячиси Гарет Бэйл трансфери режа қилинаётгани ҳақидаги хабарларга муносабат билдиришни сўрашди.
«Бэйл ёки бошқа бир алоҳида футболчи ҳақида фикр билдира олмайман, чунки улар бошқа клубга тегишли. Аммо шубҳасиз, биз сифатли ва бизни жамоа сифатида кучайтира оладиган футболчиларни излашимиз керак. Футболчи билан шартнома имзолаётганда эътиборга олиниши керак бўлган жиҳатлар талайгина.
ОАВ вакили ёки мухлис сифатида қисқа муддатли режалар тузиш осон, аммо биз узоқ вақтга барқарор жамоа қуриш ҳақида бош қотиришимиз шарт. Ҳали ўйлаб олишимиз керак бўлган кўп нарсалар бор», – деди Сульшер.
Эслатиб ўтамиз, уэльслик футболчи «Реал» бошқарувига қайтган Зинедин Зиданнинг режаларидан ўрин олмагани айтилмоқда. Матбуотда «МЮ» ушбу вазиятдан фойдаланиб, Бэйлни қўлга киритмоқчи экани ҳақида хабарлар тарқалган.