Nomlanishi o'ziga xos go'zal o'simlikni eslatuvchi ushbu salat nafaqat nomlanishi bilan balki, mazali ta'mi va ajoyib, ishtaxaochar ko'rinishi bilan boshqa salatlardan ajralib turadi. Tayyorlanishi oddiy, tayyorlash uchun barcha masalliqlar mavjud. Yoqimli va mazali salatni albatta tayyorlang ! Ushbu salat shuningdek, bayram dasturxoni uchun ham ajoyib tanlov.
Kerakli masalliqlar :
300 gramm tovuq go'shti filesi
400 gramm makkajo'xori konservasi
3 dona tuxum
200 gramm marinadlangan shampinon
200 gramm sabzi
Porey piyozi yoki oddiy piyoz
Zaytun donachalari (ta'bga ko'ra)
Chipsi (oval shaklida)
O'simlik yog'i
Ta'bga ko'ra tuz va mayonez
Tayyorlash usullari :
1. Sabzini tuz solingan suvda pishiring, sovuting va qirg'ichning kichik tomonidan chiqaring.
2. Tovuq go'shti filesini mayda shaklda to'rg'ang va qizdirilgan o'simlik yog'ida 10 daqiqa davomida qovuring.
3. Pishirilgan tuxumni qirg'ichning kichik tomonidan chiqaring.
4. Marinadlangan shampinonlarni mayda shaklda to'rg'ang.
5. Porey piyozini yarim halqa shaklida to'rg'ang. Agar siz oddiy piyozdan foydalansangiz u holda mayda to'rg'ang va 10 daqiqaga qaynoq suvda uyuting va sovuq suvda yuving.
6. Salatni yig'ishni boshlang. Buning uchun katta laganga navbatma-navbat tayyorlangan masalliqlarni soling.
7. Birinchi navbatda qovurilgan go'shtni soling va mayonez surting.
8. Har bir solingan masalliqdan so'ng, mayonez surting. Go'sht ustidan sabzini soling.
9. Sabzi ustidan marinadlangan shampinon so'ng, piyozni soling.
10. Piyoz ustidan tuxumni soling va mayonez surtish yodingizdan ko'tarilmasin.
11. So'nggi navbatda makkajo'xori konservasini soling va chipsi bo'laklarini yig'ilgan salat atrofiga terib chiqing. Hohishingizga ko'ra salatni ko'katlar bilan bezating.
Yoqimli ishtaxa !
Agar siz makkajo'xori o'rniga zaytun donachalaridan foydalansangiz u holda zaytun donachalarini ikki qismga bo'ling va makkajo'xori o'rniga zaytun donachalarini terib chiqing.