Parrandalar go'shtidan tayyorlangan taomlar parhez taom hisoblanib, oson hazm bo'ladi. Undan tashqari parranda go'shti o'zgacha mazali ta'mga ega bo'lib, ulardan tayyorlangan taom lazzatlanish baxtini tortiq qiladi. Ushbu retsept bo'yicha tayyorlanadigan taom ham shunday taomlar toifasidandir.
Kerakli masalliqlar:
4 dona tovuq filesi
50 gramm mayonez
40 gramm asal
30-40 gramm achchiq xantal (gorchitsa)
25 gramm o'simlik yog'i
4 dona sarimsoq donachalari
Tuz va achchiq ziravorlar
Tayyorlash usuli:
1. Birinchi navbatda achchiq xantal va asalli marinadni tayyorlang. Buning uchun : asal, ozgina o'simlik yog'i, xantal, mayonez va maydalangan sarimsoq, ziravorlarni birlashtiring va aralashtiring.
2. Tovuq go'shti filesini yuving va quruting. Filelarni o'rtasidan 2 ga bo'ling va maxsus oshxona bolg'asi yordamida urib chiqing. Har birini tuzlang.
3. Tayyorlangan go'shtlarni aloxida idishga soling. Tayyorlangan marinadni quying, aralashtiring va 2 soatga muzlatgichga olib qo'ying.
4. Belgilangan vaqt o'tishi bilan pergament qog'ozi yozilgan pishirish qolipiga go'shtlarni terib chiqing. 180 darajada qizdirilgan gaz pechida 40 daqiqa davomida go'shtlarni pishiring.
5. Tayyor go'shtlarni gaz pechidan olib, 3 daqiqaga dam bering.
6. Go'shtni laganga suzib, ustiga ketchup yoki boshqa souslar bilan dasturxonga torting.
Yoqimli ishtaxa!