Tez va mazali tayyorlanadigan ushbu taom yengil va parxez taomi hisoblanadi. Ushbu taomning retsepti oddiy mahsulatlarni o'z ichiga olib, mazali va ajoyib ta'mni yuzaga keltirib chiqaradi. Tushlikda va kechki ovqat dasturxonida ushbu taom yaqinlaringizning nazaridan hech ham chetda qolmaydi.
Kerakli masalliqlar:
300 gramm losos balig'i (baliqni hohishingizga ko'ra tanlasangiz bo'ladi)
100 gramm piyoz
150 ml tomat pastasi
500 gramm kartoshka
3 dona tuzlangan bodring
2 dona lavr bargi (lavroviy list)
Ta'bga ko'ra tuz, murch va ziravorlar
2 osh qoshiq o'simlik yog'i
Limon va zaytun donachalari
Tayyorlash usuli:
1. Baliq sho'rvasi uchun barcha kerakli masalliqlarni tayyorlang.
2. Baliqni qiltiriqlaridan tozalang va kastryulkaga solib, suv quying. Lavr bargi, qora qalampir donachalari solib, 20 daqiqa davomida qaynating.
3. Qaynatilgan baliqni mayda to'rtburchak yoki somoncha shaklida to'rg'ang.
4. Aloxida idishda mayda to'rg'algan piyozni qovuring va tomat pastasini qo'shing.
5. So'ng, mayda bo'laklarga bo'lingan kartoshkani qo'shing. Tuz va yarim stakan suv quying. Qopqoq ostida, past olovda pishiring.
6. Kartoshka ustiga baliq va yarim halqa shaklida to'rg'algan tuzlangan bodringni soling.
7. Barcha masalliqlar ustiga baliq bulyonini quying. Barcha ziravorlarni qo'shing va qaynating, qaynagandan so'ng, yana 30 daqiqa davomida past olovda tayyorlang. Belgilangan vaqt o'tgandan so'ng olovni o'chirib, zaytun donachalarini parrak qilib to'rg'ab qo'shing va 15-20 daqiqaga dam bering.
8. Tayyorlangan taomni kosalarga suzing va limon bo'lagi bilan bezating. Baliqli solyanka tayyor!
Yoqimli ishtaxa!