Xushbo’y va ishtahaochar. Tvorog bilan pishirilgan bulochkalar sehrli ekanligini bilarmidingiz? Ularni qanchalik ko’p tayyorlamang, pishirgan zahotingiz likopchadan bitta qolmay yo’qolib qoladi. Ushbu bulochkalarni tayyorlang va oila a'zolaringizga lazzatlanish baxtini ulashing.
Kerakli masalliqlar:
250 gramm iliq sut
2 dona tuxum
6 osh qoshiq shakar
2 choy qoshiq quruq xamirturush
60 gramm xona haroratida yumshagan margarin yoki sariyog'
450-500 gramm un
Asosiga:
300 gramm tvorog
3 osh qoshiq shakar
1 dona tuxum
1 choy qoshiq vanilin
1 dona tuxum sarig'i
⠀
Tayyorlash usuli:
1. Iliq sutga xamirturush va 1 choy qoshiq shakar solib, 10 daqiqa iliq joyda qoldiring.
2. Chuqurroq tog'orachaga un, shakar, tuxum, xamirturushli aralashma va yumshagan sariyog'ni solib aralashtiring va qo'lga yopishmaydigan, yumshoqroq xamir qoring.
3. Xamirga kolbasimon uzun shakl bering va uni 15 ta bo'lakchalarga kesib chiqing.
4. Xamir bo'lakchalarini aylana shaklga keltiring, pergament qog'ozi solingan pishirish qolipiga terib chiqing. Bir-birining orasida 5-7 sm joy qoldiring. Ustiga sochiq yopib, 40 daqiqaga tindirib qo'ying. ⠀
5. Nachinkani tayyorlab oling. Buning uchun : tvorogga shakar, tuxum, vanil shakari va bir chimdim tuz solib, aralashtiring.
6. Stakan ostini unga belang, xamirchalarning ustiga bosib chiqing va hosil bo'lgan bo'shliqqa 1-2 osh qoshiqdan tvorogli aralashmadan soling.
7. Qolgan xamir qismlariga chayilgan tuxum sarig'ini surting. 190-200 darajada qizdirilgan gaz pechida 20 daqiqa davomida pishirib oling.
Yoqimli ishtaha!
⠀
