Pazanda uy bekasi uchun bulochka tayyorlash bu murakkab ish emas. Pishloqli bulochka harajati tejamli, mazasi esa juda ham mazali bo'lib, uncha ko'p vaqtingizni ham olmaydi. Pardek yumshoq bu bulochkalar dasturxoningizdan bir pasda g'oyib bo'lib, yaqinlaringizga hamda bolajonlarga juda ham manzur bo'ladi.
Kerakli masalliqlar:
7 stakan un
22 gramm quruq xamirturush
2 stakan shakar
1 choy qoshiq tuz
400 - 500 ml sut
110 gramm saryog'
2 dona tuxum
500 gramm pishloq (chedder)
1 bog' petrushka ko'kati va sarimsoq
Tayyorlash usuli:
1. Tayyorlash jarayonida hech narsani esdan chiqarmaslik uchun barcha kerakli masalliqlarni tayyorlab oling.
2. Chuqur bir idishda saryog'ni eriting. Ozgina sovugandan so'ng sut, tuz va shakarni qo'shing. Gaz pechida doim aralashtirib turgan holda past olovda isitib, shakarni eritib, olovdan oling. Xona harorati darajasigacha sovuting.
3. Aloxida idishga un va xamirturishni aralashtiring.
4. Sutli massaga unning bir qismini soling, tuxumni qo'shib, ko'pirtiring va qolgan un qismini qo'shib, yumshoq xamir qoring.
5. Tayyor xamir ustini yopib, 1 soat mobaynida issiq joyga olib qo'ying.
6. Ko'tarilgan, tayyor xamirni avval ikki qismga bo'ling. So'ng, mayda bo'laklarga bo'ling ( taxminan 16 qismga ).
7. Pishloqni katta bo'lmagan, to'rtburchak bo'laklarga bo'ling. Xamir bo'lakchalarini ozgina yoying. O'rtasiga pishloq bo'lagidan qo'yib, yumaloq shaklda aylantiring.
8. Tayyor sharchalarni pergament qog'ozi solingan pishirish qolipiga terib, 10 daqiqa sochiq bilan yopib qo'ying.
9. Bu vaqt mobaynida bulochkalar ustiga yanada chiroy berish uchun sarimsoqli massani tayyorlang. Buning uchun : saryog'ni eriting va 2 - 3 dona sarimsoq donachalarini maydalab, qo'shing va aralashtiring.
10. Va yana pishloqni mayda qirg'ichdan o'tkazib, maydalangan petrushka ko'kati bilan aralashtiring. Bu bulochkalar ustiga sepish uchun.
11. 10 daqiqadan so'ng, 180 darajada qizdirilgan gaz pechiga 20 daqiqaga bulochkalarni qo'ying. So'ng, gaz pechidan olib, sarimsoqli massadan
surting va usti tilla rang tusga kirgunga qadar pishiring.
12. Bulochkalar pishib chiqishi bilanoq ustiga pishloqli massadan sepib chiqing.
Yoqimli ishtaxa!