26 гыйнварда «Timerman” (Тимерман) проекты үзенең спорт сезонын беренчеләрдән булып Байлар Сабасының Сабинка елгасы буенда төнге чаңгы ярышлары белән башлады. Зәмһәрир салкын көн булуга карамастан, районыбызга Россиянең 7 төбәге, Татарстанның 10га якын районыннан 350дән артык иң көчле спортчы килде.
Старт сызыгына 15сәгать 30 минутта иң беренчеләрдән булып 300 метр дистанциядә узышырга балалар басты. Көннең үтә салкын булып, температура -17 градус күрсәтүенә карамастан, 40 тан артык бала билгеләнгән дистанцияне чын спортсменнарча үтә алдылар. «Суыктан курыкмыйча, быел узышка килгән балаларның күбрәк булуы аеруча шатландыра, аларга теләктәшлек күрсәткән әти-әниләренә зур рәхмәт. Мондый матур мәйданчыкны, мондагы шартларны тагын да күбрәк балаларга күрсәтәсе иде», – ди «Тимерман» сериясенең башкарма директоры, балалар узышы координаторы Алена Сергеева. Ярышта катнашучылар арасында Башкортостан, Удмуртия, Киров өлкәсеннән дә балалар булуы да бәйгенең популярлыгын дәлилли иде. Әле 3 яшь тә тулмаган иң кечкенә спортчы волонтерлар ярдәме белән булса да, билгеләнгән дистанцияне узды. Чыннан да, ул көнне «Сабинка»ның гаҗәеп матурлыгы, төрле төсләр балкышы һәркемне үзенә җәлеп итеп, спортчыларны хозурландырды. «Бүген әтием, кызым белән бергәләп ярышка килдек. Кызым 2 километрда, үзем 5тә, әтием 15 километрда узышачакбыз. Узган ел да катнашкан идек. Гаиләбез белән спортны яратабыз, күнегүләрне калдырмаска тырышабыз. Трасса яхшы, тирә-юньдә матурлык, һава торышы яхшы, җил юк, кәефләр күтәренке», – ди Сабадан Илдар Миннеголов.
«Тимерман» спорт чаралары сериясе директоры Вадим Янгиров спорт чарасына кушылучыларны сәламләп, кунакчыл сабалыларга рәхмәтен белдерде. «Безне, оештыручыларны, көннәрнең суык торуы бераз куркытты. Әмма бүген җилнең булмавы һәм дымлы һава күзәтелмәве спортчылар өчен уңайлы. Узган ел үзем дә ярышларда катнашкан идем, быел алдан әзерләнергә вакыт булмады. Безнең төп максатыбыз – халыкны массалы төстәге спорт чараларына җәлеп итү», – ди Вадим Янгиров. 2 км дистанциядә финишка беренчеләрдән булып Шәмәрдән лицее укучылары Айгөл Зиннәтова һәм Асия Маметова килде. Сабинка буе бер мәл чаңгы тавышыннан, җанатарлар көч биргән авазлардан яңгырап торды. 115 спортчыны берләштергән 5 километрлы дистанцияне беренчеләрдән булып 13 минут 51 секундта Саба егете Рамил Шакиров узды. Рамил үткән ел да әлеге араны 14 минут 59 секундта үтеп, җиңүче булган иде. 2нче урынны Шәмәрдәннән Улугбек Вайисов яулады. Хатын-кызлар арасында 1-2 урыннарны Саба гимназиясе укучылары Камилә Сөләйманова һәм Сабина Хәбирова яулады. Спортта секундлар хәл итүен кызларның күрсәткечләрендә нәкъ 1 секунд аерма булуы исбатлады. «Тимерман» проектының чаңгы ярышын үзебезнең районда кабул итүебезгә бик шатбыз. Безгә күрсәткән зур ышанычыгыз өчен бик зур рәхмәт. Мондый төр ярышлар районда, республикада чаңгы спорты үсешенә зур этәргеч бирә. Моннан соң да нәтиҗәле хезмәттәшлектә булыйк», - диде башкарма комитет җитәкчесе Марат Ишниязов җиңүчеләрне тәбрикләп. 17 сәгать 30 минутта «Тимерман» проектының 15 километрлы стартына оештыручылар әйткәнчә, иң чыдам 111 «тимер» спортчы басты. Әлеге дистанцияне иң тиз килүе (38 минут 43секунд) районыбызның спорт остасы Руслан Миннегуловны пьедесталның иң югары баскычына күтәрде. Шулай ук Сабадан Данил Ганиев 3нче урынны алды. Җиңүчеләрне район башлыгы Рәис Миңнеханов тәбрикләде. Әлеге чараны оештыруда 67 волонтер ярдәм итте. Теләгән кешеләргә оештыручылар чаңгыларны прокатка бирде, ЭКСПО күргәзмәләр, төрле сәүдә рәтләре эшләде, суыктан курыкмаганнар кар чанасында шуып хозурланды.
Фәридә Вилданова.