28 гыйнвар көнне кичке сәгатьләрдә Баландыш Чыршы бәйрәме узды.
Ул бер баландышлылар өчен генә түгел, күрше-тирә авылларда яшәүчеләр, тулаем алганда район халкы өчен зур бәйрәм булды. Авыл эченә, шугалак уртасына Яңа ел Чыршысы урнаштырылган мәйданда алма төшәрлек тә урын юк иде. Чаналы атларда килгән дистәгә якын Кыш бабай һәм Кар кызларының бердәй мәйданга килеп керүе генә дә үзе ни тора! Бу көнне бирегә килгән халык авыл үзешчәннәренә кушылып, җырлады, биеде, рәхәтләнеп күңел ачты.Тәүге тапкыр оештырылучы күркәм бәйрәм белән баландышлыларны муниципаль район башлыгы Илдус Зарипов һәм аның урынбасарлары да котлады. Әлеге бәйрәмне оештыруда башлап йөргән авыл җирлеге башлыгы Рөстәм Мөхәммәтшинга, аның бертуган абыйсы, шәхси эшмәкәр Саматка һәм аларга зур теләктәшлек белдергән, Яңа ел шәһәрчеген төзүдә ярдәм иткән Баландыш авыл халкына халкына зур рәхмәт белдерде. Ул уенын-чыны бергә кушып, Баландышта корылган Яңа ел шәһәрчеген Америка Кушма Штатларының Невада штатында урнашкан Лас - Вегас шәһәре белән чагыштырды. Чыннан биредә авылны бизәү, кешеләр күңелендә Яңа ел рухы тудыру өчен бик зур эш башкарылган. Алай гына да түгел, матди чыгымнар да шактый тотылган. Тырышсаң, әллә ниләр эшләп була икән. Авылда һәр йортның капка төбе аллы-гөлле утлар белән бизәлгән, күпчелегенә кар сыннары ясап куелган.
Бу хакта тулырак "Теләче" газетасыннан таныша аласыз.