Яңа ел бәйрәме алды көннәрендә Байлар Сабасы бистәсе һәм авыллар урамнары, сәнәгать предприятиеләре, учреждениеләр, социаль объектлар биналары фасадлары үзгәрешләр кичерә.
Алардагы матурлык салават күперенең барлык төсләре белән утлар кабынган кичке вакытта аеруча сизелә. Ә күңеллесе, әлбәттә, үзәк мәйдандагы төп чыршы утларының балкышы. Шул вакытта кар-боздан ясалган Кыш бабайлар, кар кызлары, урман җәнлекләре дә җанланып парадка тезелә. Районыбыз учреждениеләре, оешма-предприятиеләре тамашага быел тагын да оригинальрәк номерлар әзерләгәннәр. Парадны беренче булып башлаган мәдәният хезмәткәрләре мәйданга көпшәсеннән утлар чәчеп торган танк белән керде. Бортмеханигы – яшь кенә малай. Техника читкә каера башласа, командирлары Рөстәм Заһидуллин күпләрне шаккаттырып, аны җәһәт кенә туры юлга чыгарып куйды. Ничә метрлап материал киткәндер, әмма мәдәният хезмәткәрләре кулында җилфердәгән Россия, Татарстан һәм районыбыз әләмнәре халыкларны дуслыкка, бердәмлеккә чакыру булып кабул ителде. Санап бетергесез Кыш бабайлы һәм Кар кызлы мәгариф учреждениеләре колонналары сабалыларны туктап җыр-биюләре белән сәламләделәр. Сәләтле балалар мәктәбе укучылары да кулларындагы веерларны нәкъ кытай кызларына охшатып бер дулкында уйнаттылар.
Яңа ел – ул Санта Клаусның – болан җигеп, ә Кыш бабайның атларда килүе. Шушы күркәм гадәтне парадта авыл җирлекләре саклап килә. Быел атлылар колоннасына “Сабантуй” комплексы Кыш бабае да ак трантаслы байталы белән кушылды. Быел Татар атлары аерым токым буларак теркәлде һәм Саба республикада аларны үрчетүче районнарның берсе икәнен дә онытмыйк. Елларны көнчыгыш календаре буенча гәүдәләндергән техника парады исә 12 ай циклы тәртибендә тезелгән иде. 2019да әлеге циклны Дуңгыз елы төгәлли. “Сабагаз” идарәсе егетләре бу җан иясен үзенә бик тә ошатып ясап, машинага бастырганнар иде.
Хезмәт коллективларының бәйрәмгә әзерләнүдә күрсәткән тырышлыгына нәтиҗә төп Чыршы утлары кабынгач ясалды. Җәяүлеләр арасында 1нче урынның мәдәният бүлегенә бирелүе белән барысы да килешеп, гөр килеп, шаулатып алкышлады. Жюри 2нче урынга “Бәләкәч” бакчасы һәм финанс-бюджет палатасы лаек дип тапкан. Ветеринарлар һәм социаль яклау бүлеге 3нче урынны алды. Атлар төркемендә икеләнергә урын юк: беренчелек “Сабантуй” комплексында.
Мишә һәм Олы Нырты авыл җирлекләре призерлар булды. Парадка транспорт бизәүдә хәрәкәтләнеп торучы, алгы аягына капкынга куелган сырны эләктергән Күсе ясаган “Татавтодор” филиалы егетләренә тиңнәр булмады. Янгын частенең – бәрәненә, “Таттелеком”ның этенә – 2нче, “Сабагаз”ның дуңгызына һәм аграр көллиятнең аҗдаһасына 3нче урыннар бирелде. “Дөрестән дә, бик матур әзерләнгәннәр, зур тырышлык куйганнар. Бу тамашаны үз күзләрең белән күрү кирәк. Кемнәргәдер үкенеч, алар тамашаны күрмичә калды. Әлбәттә, барысына да беренче урын бирер идең дә бит, алай эшләп булмый. Эшләрегездә дә зур уңышлар, рәхмәт сезгә барысы өчен дә”,– диде сабалыларны якынлашып килүче Яңа ел белән тәбрикләгән район башлыгы Рәис Миңнеханов.
Инде бәйрәмгә чыршы бизәү Сабада бөтенхалык эшенә әверелеп бара. Быел 21 шәхси хуҗалыкның сәхнәгә чакырылып үз урамын матурлауга керткән хезмәте өчен кызыксындыру бүләге алуы шул хакта сөйли. Район башлыгы һәркемне алар үрнәгенә иярергә чакырды.
Ул көнне Сабага физик мөмкинлекләре чикләнгән райондашларыбызны республика ярышларында ирешкән уңышлары белән котларга инвалидларның физкультура-спорт җәмгыяте рәисе, Россия Федерациясенең атказанган тренеры Фәридә Сафиуллина һәм параолимпия чемпионы Ирина Полякова да килгән иде. Безнекеләр күп бәйгеләрдә җиңүчеләр һәм призерлар исемлегендә. “Әгәр район җитәкчелеге тарафыннан инвалидлар турында кайгырту һәм үзара аңлашу булмаса, Саба командасы авыл районнары арасында 2018 ел нәтиҗәләре буенча беренчелеккә чыга алмас иде”,– диде Фәридә Сафиуллина һәм Рәис Миңнехановка зур Кубок тапшырды.
Сабада гына шулай гаҗәеп әзерлек белән оештырыла ала торган бәйрәм тамашасын карарга күпләр үзләренең чит җирләрдә яшәүче туганнарын да ел саен чакыра. Мәскәү кунагы Раушания Гареева да үз гомерендә беренче тапкыр гаҗәп матур парадны күрә алуына бик шат булуын белдерде. “Минем Килдебәктән киткәнемә инде 30 ел. Шуннан бирле юньләп кар да күргән юк иде. Кыш бабайлар парадын күрергә махсус кайттык, бик ошады, хатыным Гөлсинәнең дә күңеленә хуш килде. Иң хозурландыргыч мизгелләрне фотога да төшердем, болай булгач, Сабада шундый бәйрәм оештырганнарын безнең якта да күрәчәкләр”,– диде Краснодар краеның Хадыженск шәһәрендә яшәүче Габделхак Хәбибрахманов.
Гомумән, халык кичке күк йөзендә аллы-гөлле фейерверклар кабынып, бәйрәм салюты бирелгәнче таралырга ашыкмады. Тамаша күңелле җыр-музыка, Кыш бабайлар, Кар кызлары чыгышлары белән дәвам итте.
Фәридә Вилданова, Фәнил Мәүлетов, Микәил Заһидуллин фотолары