Təbrizdə ,, Sancaq'' qəzetində Ustad Şəhriyara yazdığlm şeir dərc olunmuşdu, bu şeirin çap olunmasında şair dostum Ümid Neccarinin böyük əməyi olub..
Minnətdaram əziz qardaşım,qəzeti gətirdiyin üçün qurur hissi keçirdim.Bu şeiri Təbrizdə dərc eləmək böyük casarət tələb edir. Eşq olsun!
GƏLİB MƏZARINI ÖPƏCƏYƏM MƏN
Bir tarix yazdılar silə bilmədim,
Dolaşdım məftilə, telə bilmədim,
Əlini öpməyə gələ bilmədim,
Gəlib məzarını öpəcəyəm mən.
Hər sözdə,misrada hər bir
deyimdə,
Səni oxuyuram tükəndiyimdə,
Düşüb Savalana quş dimdiyində,
Qarlı zirvəsində bitəcəyəm mən.
Bu yalan dastanı bitirmək üçün,
Ruhumu ruhuna ötürmək üçün,
O tayı, bu taya gətirmək üçün,
Araz qırağına gələcəyəm mən.
Dayazda islanıb üzüb dərinə,
Mən könül vermişəm yalnız birinə,
Təbrizdən Bakıya sərhəd yerinə,
Azadlıq sözünü düzəcəyəm mən.
Kimsə kəsə bilməz yazan əlimi,
Bütöv Azərbaycan deyən dilimi,
Ölümü öldürüb bax sənin kimi,
Vətən deyə-deyə öləcəyəm mən