7 декабрьдә районыбызда Саба, Кукмара, Балтач, Әтнә, Арча районнары катнашында «Тату сыйныф серләре» республикакүләм конкурсының зона этабы узып, Саба гимназиясенә әлеге районнарның иң үрнәк ата-аналар комитетлары җыйналды.
Педагоглар, укучылар һәм әти-әниләр бердәмлеген, нәтиҗәле эшчәнлекләрен күрсәтүче конкурска барлык коллективлар да зур әзерлек белән килгәннәр иде. Әлеге мәртәбәле бәйгенең район этабында иң лаеклысы дип Олы Кибәче урта мәктәбенең V сыйныфы (җитәкчесе Сиринә Сафина) ата-аналар комитеты танылып, зона турында районыбыз данын яклау хокукына ия булдылар. Чарада катнашучыларга район башкарма комитеты җитәкчесе Марат Ишниязов уңышлар теләде. «Тәрбия мәсьәләсендә укытучыларның гына түгел, әти-әнинең дә роле зур. Шуңа әлеге проект бик тә әһәмиятле»,- диде җитәкче үз чыгышында. ТР мәгариф һәм фән министрлыгының өстәмә белем бирү бүлеге әйдәп баручы белгече Семен Федоров да мәктәп белән әти-әниләр бердәмлегендә генә уңышка ирешеп булуын һәм әлеге конкурс һәр сыйныфның никадәр дуслыгын, иҗадыйлыгын ачып бирергә зур мөмкинлек икәнлеген билгеләп үтте. Командалар иң элек үзләренең эшчәнлеген күргәзмәләр аша яктырттылар, визит карточкасы тәкъдим иттеләр, алдан бирелгән темага проект эше якладылар. Һәрбер чыгыш үзенчәлекле, нык әзерлекле, иҗадыйлыгы белән игътибарны җәлеп итте. Визит карточкалары укучыларны виртуаль һөҗүмнән йолып калу, интернет технологияләрнең балаларга начар йогынтысы, волонтерлык, сәламәт тормыш рәвеше, батарейкаларның сәламәтлеккә зыяны һәм башка яшәеш проблемаларына багышланды. Олы Кибәче ата-аналар коллективы «Теремкәй» әкияте үрнәгендә укучыларда кешелеклелек, бердәмлек, хезмәтсөючәнлек, дуслык хисләре тәрбияләү юлларын күрсәттеләр. «15 укучыны берләштергән 5 сыйныфларның бик тырыш, актив ата-аналар комитеты оешты. Мәктәптә иң алдынгы сыйныфлар рәтендә барабыз: бөтен әти-әниләр дә кул эшләренә, җыр-биюгә бик сәләтле. Әлеге конкурска да бик ныклап әзерләндек, башта мәктәптә, аннан район этабында катнаштык. Биш юнәлештән торучы «Киләчәккә адымнар» проекты буенча эшчәнлек алып барабыз. Күргәзмәдә дә үзебезнең классның әти-әниләре тарафыннан эшләнгән кул эшләре урын алган. Конкурс шәхсән минем өчен бик тә кызыклы булды, төрлебезне төрле яктан ачтык. Әти-әниләрнең осталыгына чын-чынлап инандык», -ди Венера Дәүлиева. Кибәчелеләр шулай ук үзләренең бер гаилә булуларын раслап, 5нче сыйныфларның бөтенесен дә туплаган гаилә агачы да булдырганнар. Кыскасы, мәртәбәле жюри кибәчелеләрнең эшчәнлеген бу юлы да югары бәяләде, алар 2нче урын яулап, республика турында да чыгыш ясаячаклар.
Фәридә Вилданова.
