Ўзбекистон терма жамоаси собиқ бош мураббийи Тимур Кападзе "Футбол Экспресс" газетасига интервью берди.
Ушбу интервьюда "Локомотив" ёшлар жамоаси устози "Осиё Кубогида терма жамоамизда нимани кутиш мумкин?" деган саволга қуйидагича жавоб қайтради:
- Афсуски, терма жамоамизда ўйин йўқ. Тўғри, ўтказилган ўртоқлик учрашувлари ҳусусида ҳеч ким ҳисобот сўрамаяпти. Лекин Купер бошчилигида олтинчи ўйин ўтказилган бўлса, шу вақтгача терма жамоамиз ўйинида нимадир кўриниши керак эди.
Биз кўпроқ тўп билан муомалада бўлишимиз, рақибни имкон қадар тўпсиз қолдиришимиз керак. Ҳаттоки, гарчи Уругвайга ютқазган бўлсак-да, бу усулни қўллай олдик. Балки Жанубий Кореяга қарши ўйиндан сўнг мураббий ҳам ўйланиб қолгандир ва энди бошқа жиҳатларга ҳам эътибор қаратар.
Эктор Купер ўз тактикасини қўллаяпти, аммо унинг услубига бизнинг футболчиларимиз қанчалик мос тушиши эса бу ўйлантирадиган савол бўлиб чиқаяпти, - дейди Кападзе "Футбол Экспресс" газетасига берган интервьюсида.
