Петропавловскак- Камчаткакен малав’ъяйтыӈ яллай 65 вэтатылг’о инэнмэлэв’ъиччетылв’ынык, маӈэныныйикыӈ нэтэйкынэв’ прививкав’. Мыкъян келлаӈ вэтатылг’о йинмэлэвэтык аӄачыг’ычгиӈылг’о.
«Муйик поликлиникак нэкутэйкыӈнэв’ тынпов’ тит атг’ылӈывока аӄачыг’ычгиӈа инэнмэлэвылг’у. Мыткотынпоӈнав’ вакцината «Гам-КОВИД-Вак». Эмет ынниг’ан валг’о прививкав’ янотыӈ мыттэйкынэв’ йиг’илгын явалэтыӈ гайматылг’ыйикыӈ энамалавылг’ыйикыӈ. Нымэлг’эв’ галай тав’аӈгиӈын. Уйӈэ мекнаӈ ӄэв’в’аӈ энг’элкэ»,- эвыӈ инэллэчг’ын 1 городкэн малав’ъяк Ирина Вайнес.
Паӈав’ъйийг’ылв’ыйик Камчаткайтыӈ нэеннэв’ 200 вакцинав’, амъел нэетэйкыӈынэв’ прививкав’.
«Янотыӈ наятынпойкынав’ инэнмэлэвылг’у, вэтатылг’о яйгочав’ӈыиччетылв’ынык, социальный вэтатылг’о то вэтатылг’о коммунальный иччетылв’ынык. Ыннею привикав’ кытаван тэйкылг’у ӈыечеӈ. Титэ китыӈ виткукин прививкан, нагаланав’ 21 г’ылв’ыёв’ тит тэйкык ӈыеӄэв’кин. В’отэныӈӄо ынниг’ан мытковэталлаӈ, тит ангытг’ылв’ыйик опта мынг’ытэйкикынэв’ ӈыеӄэв’кинэв’ прививкав’»,- панэнатвэ инэллэчг’ын энанмалав’гиӈэпыӈ крайик А. Кузьмин.
***
Камчаткаӈ еллаӈ федеральный в’эннятгиӈо инэнмэлэвылг’э малавъяйтыӈ, эвилэткэ итылг’э инэльпинӈэ малавылг’ыйикыӈ яяк. В’отэныӈӄо иви омакальг’анма В. Солодов. Лайвыма Москвайтыӈ, ӈанко ынан танаэтгыӈнэн пыӈлов’ аӄачыг’ычгиӈыкъет омакаӈ инэллэчг’ык энанмалав’гиӈэпыӈ РФ М. Мурашко.
«Мыттанвэтгынмык, инэллээччатыӈӄо энанмалав’гиӈэпыӈ РФ еллаӈ в’эннятгиӈо тит эӄлэткэ энанмалавылг’ыйикыӈ малав’ъяк. Мыткуг’энӈынэв’ инэнмэлэвылг’у ӄотэннотаӈӄо. Опта еллайкэ энаев’латниӈо лекарставкен, тит эӄлэткэ ныг’итикынэв’ тыг’ыллыг’у , мэлэвылг’у яяк, эвилэткэ итылг’э инэльпинӈэ. Янот коӄланӈыволаӈ лекарстваӈ, эчги ыннею аӄайпыгиӈо элэк мыткуччыӈнэв’, тит Тойгэвэгиӈык нытвайкынав’ инэгэю инэльпинӈин»,- эвыӈ В. Солодов.
Галалг’ыпаӈав’ъйийг’ылок Камчаткайтыӈ яллай 11 инэнмэлэвылг’у то 4 ычгинэв’ в’иннетычг’у медсёстрав’.
Эчгыпо йинчоччымав’нэн С. Тынанто.