73 гайматылг’о в’иннетык нанойпакменнав’ медалята Президентан РФ, мыев’ ыччу эллай Ымроссийский этгиӈык «Муюомакаӈ».
Майӈыванык тойваятэн нэйилнэв’ ойпакмето в’эннятычг’ыйикыӈ. В’утку итгыг’и инэллэчг’ын крайик В. Солодов то вице-губернатор П. Ясевич.
21 тэнмыталойиг’илгык Камчаткак гантоӈвав’лэн иччет «Муюомакаӈ»,миӈки келлаӈ ӄымэк 300 в’иннетычг’у, ымыӈ ыявак итылг’ыӈӄо районыӈӄо. Вэтанма в’уччин иччет, нэв’инненэв’ 1,7 тысячав’ г’уемтэв’илг’у. Имы яӄэпыӈ в’эннялай, ымыӈ пичгывэлитколай, лекарствав’ то ею в’аӈлалг’о тыг’ыллыг’э нэеннэв’. Мыкыӈ 7 тысячав’ ёнатылг’ыйикыӈ нэйилнэв’ эвилэткэ итылг’у печгыёчго. Энма тайкыён «Уетык мачгиӈэн» мыкыӈ 185 пичгыёчго нэйилнэв ӄылатылг’ыйикыӈ пылв’ынтэпыӈ то ниччыг’эв’ ёнатылг’ыйикыӈ. Мыев’ эчги гымлэ ӈыволай итык энанг’отав’гиӈо аӄачыг’ычгиӈыкъет ынпычг’ыӈ маӈэныйикыӈ келлаӈ мыкыӈ 65 гэвэгиӈо, 17 кытэплёйиг’илгык гымлэ ӈывой вэтатык в’иннетычг’ын иччет. В’иннетычг’у амъел ков’эннялаӈ валг’ыӈ яяк, наколлаӈвоӈнав’ пичгу, инэльпинӈу то ею ӈын накотайкыӈвоӈнав’, ӈэвэӄ наков’аӈлаӈвоӈнав’.
***
Камчаткак нэгитэнэв’ акметгиӈо тайкыёлӄылэпын «Яйичг’ыкенав’ пыллыӈгиӈо то малгиӈо». В’утин тайкыёк, меӈин гэнтыльг’элин 75 гэвэгиӈэтыӈ Эналватгиӈык танӈычейма, эллай ӈынвыӄ камчаткакенав’ яйичг’о то имыяӄ вэтатъиччетылв’ыно. Энангыеватгиӈык в’уччин этгиӈын итти инэллэчг’ын крайик В. Солодов.
Юнэтылг’э 9 муниципальный эччатыӈӄо нэннийнэв’ амалваӈ валг’о вэтгиӈо, меӈию чинин ганчоччымав’лэнав’. В’утку эллай ымыӈ кымиӈу 7 гэвэгиӈылг’у то ынпычг’у 89 гэвэгиӈэтыӈ. Ычгынан нэнгыйивеннэв’ ыппуфильмав’, видеовэтгиӈо, панэнатво апаппокъет.
Эчгыпо йинчоччымав’нэн С. Тынанто.