Yengil vazn toifasida UFC chempioni Habib Nurmagomedov 1-dekabr kuni Toshkentda o‘tkazilgan matbuot anjumanida GFC promoushenini sotib olgani va O‘zbekistonda yana bir bor musobaqa o‘tkazish borasida gapirdi.
“Ha, men GFC promoushenining yuz foizlik egasiga aylandim. O‘zbekistonda musobaqa o‘tkazish borasida Otabek Umarov bilan suhbat qurdik, bu rejamizda bor. Menimcha, bu yerdagi ilk musobaqa ramazondan keyin bo‘lsa kerak. Pandemiya sabab muddat biroz o‘zgarishi mumkin, may oyi boshi yoki oxirida O‘zbekistonda musobaqa o‘tkazishni mo‘ljallayapmiz.
O‘tgan safargi musobaqadan keyin mamlakatda MMA’ga bo‘lgan qiziqish ulkan suratda o‘sganini ko‘rdik. Bu ko‘plab sportchilarga motivatsiya berdi.
O‘zbekistonda musobaqa o‘tkazish rejamizda bor. Balki, 2019-yildagi kabi 14-15 ming muxlisni yig‘ishning iloji bo‘lmas, biroq o‘sha darajadagi musobaqani o‘tkazish niyatidamiz”, — deydi Habib.
Ma’lumot uchun, Habib Nurmagomedov GFC promoushenini 1 million dollar evaziga sotib oldi va uning nomini EFC’ga (Eagle Fighting Championship) o‘zgartirdi.
Eslatib o‘tamiz, 2019-yilning noyabrida Toshkentdagi “Humo Arena”sida GFC 20 musobaqasi o‘tkazilgan. MMA kechasining asosiy jangida Umar Nurmagomedov chempionlik kamarini muvaffaqiyatli himoya qilgandi.