Тропарь: Уст твоих, якоже светлость огня , возсиявши благодать, вселенную просвети: не сребролюбия мирови сокровища сниска, высоту нам смиренномудрия показа. Но твоими словесы наказуя, отче Иоанне Златоусте, моли Слова Христа Бога спастися душам нашим.
Молитва: О святитель великий Иоанне Златоусте! Ты многие и различные дарования от Господа приял еси, и яко раб благий и верный, все данные тебе таланты добре умножил еси: сего ради воистину вселенский учитель был еси, яко всяк возраст и всяко звание от тебя поучается. Се бо отроком послушания образ явился еси, юным- целомудрия светило, мужам- трудолюбия наставник, старым- незлобия учитель, инокам- воздержания правило, молящимся- вождь от Бога вдохновенный, мудрости ищущим- ума просветитель, витиям доброглаголивым- слова живого источник неисчерпаемый, благотворящим- милосердия звезда, начальствующим- провления мудрого образ, правды ревнителям- дерзновения вдохновитель, правды ради гонимым - терпения наставник; всем вся был еси, да всяко некия спасеши. Над всеми же сими стяжал еси любовь, яже есть союз совершенства, и тою, яко силою Божественною, все дорования в душе твоей во едино совокупил еси, и туюжде любовь, разделенная примиряющую, в толковании словес апостольских всем верным проповедал еси. Мы же грешные, по единому кийждо свое дорование имуще, единения духа в союзе мира не имеем, но бываем тщеславны, друг друга раздрожающе, друг друга завидяще; сего ради дарования наши разделенные не в мир и спасение, но во вражду и осуждение нам приложишася. Темже к тебе, Святителю Божий, припадаем, раздором обуреваемы, и в сокрушении сердца просим: молитвами твоими отжени от сердец наших всяку гордость и зависть, нас разделяющие, да во мнозех удех едино тело церковное невозбранно пребудем, да по слову твоему молитвенному возлюбим друг друга и единомыслием исповемы Отца и Сына и Святого Духа, Троицу Единосущную и Нераздельную, ныне и присно и во веки веков. Аминь.