Камчаткак ӈывой вэтатык ымроссиякен ыннэн гынун тит экмитык айӈав’гиӈо пыӈлойпыӈ COVID-19. Опта в’утку тывык то пыӈлок ымыӈ ею энанмалав’гиӈэпыӈ. Китыӈ никмыӄин номер «122». Вэтатылг’а кол-центрак ымыӈ ею наятвыӈнав’ аӄачыг’ыгиӈыкъет.
«Титэ козвонинӈыволаӈ «122», яӄам инг’э накалкылӈын г’уемтэв’илг’ын, меӈин китыӈ Камчаткак. То инг’э куннийӈынин кол-центрайтыӈ краевой Энанмалав’ъэччатыӈ»,- эвыӈ инэллэчг’ын цифровой этгиӈэпыӈ крайик Н. Киселёв.
Эчги инэллэчг’э энанмалав’гиӈэпыӈ крайик накотанвэтгыӈнав’ этгиӈо ӈанэныйикыӈ, мекив’ ковэталаӈ кол-центрак , тит ычгынан нэнг’ыйиликынэв’ энанъеёлав’гиӈо тыг’ылгиӈыкъет, то пыӈлов’ миӈкые нэеллэйкынэв’ аӄачыг’ычгиӈылг’о, яӄ малавъяйтыӈ.
«Эчги г’уемтэв’илг’у утгыкэ ятакалэӈлайкэ тит ӄытык энанмалавылг’ыйикыӈ, меткэ нэйивикынэв’ ею тэйкык тит еӄӄым атг’ылӈывока ог’анма лекаро . Эчги тыг’ыллыг’у юлэӄ ког’анӈыволаӈ тит ёг’ык лекаро, то актыка нызвонинав’ поликлиникайтыӈ»,- эвыӈ Н. Киселёв.
Титэ коӈволаӈ звонитык «122», яӄам инг’э ымыӈ в’аняво нэкуннийӈынэв’ кол-центрайтыӈ , ӈанӄойиӈ накэнаейӈынав’ малав’ъяв’ тит ёккы малав’ъяйтыӈ аӄачыг’ычгиӈылг’о.
Инэллэчг’ын региональный Роспотребнадзорык Я. Господарик эвыӈ,тит увийкив’ яйтаӈык- ӄонпыӈ нанг’ыявайкынав’ г’иӈытг’ымъайпинӈу тит атг’ылӈывока COVID-19. Гамга общественный ванык кытаван наг’ыявайкынав’ г’иӈытг’ым айпинӈу.
Мыкыӈ 50 калив’ нэтэйкынэв’ эччаттыӈ меӈию ковэтталаӈбизнесык, тит ычгынан нанг’ынтоӈвавэкынав’ нымэлӄинэв’ вэтатвано. Тит ӈывома вэтатгиӈо, нэнг’ынчичг’этикынэнэв’ температура. То ӄонпыӈ нанг’ыпӈылойкынав’, этун йинны кутг’ылыӈ, меткэ котвалаӈ тыг’ыллыг’у аӄачыг’ычгиӈа яяк, яйичг’ык. Ӄонпыӈ ымыӈ ею нанг’ынмытэкынав’. То ӄонпыӈ нанг’ыявайкынав’ г’иӈытг’ымъайпинӈу»,панэнатвэ инэллэчг’ын краевой Роспотребнадзорык , то этг’у эвыӈ, кытаван ӄонпыӈ нанг’ыявайкынав’ г’иӈытг’ымъайпинӈу общественный лэйвинэӈык.
Эчгыпо йинчоччымав’нэн С. Тынанто.