399-шы Қара пайым-сөз: Астрономия ғылымы мен «Тоғыс есебі» бірге туған егіз ұғымдар

Астрономия – адамзат баласына сана пайда болған өте ежелгі замандарда зерттеле бастаған ең бірінші ғылым. Соған қарамастан ол әлі толық зерттеліп болған жоқ, керісінше күннен-күнге оның зерттейтін ауқымы үлкейіп, астрономияға қатысты пән аралық жаңа көптеген ғылымдар пайда болу үстінде. Сол себепті астрономияның өзін зерттеу былай тұрсын, ол зерттейтін салалардың тек тақырыптары немесе әліпбилік тізбесінің өзі тұтас бір мақалаға (дұрысы кітапқа) жүк болады. «Facebook»-тағы оқырмандарым қазақ тілді болса да, астрономияға қатысты қазақ тілінде тіл мен көңілді тұщытатын кітап-жазбалар әлі күнге жазылған жоқ. Осы жолдардың авторы бұл кемшілікті жою үшін 800 беттік кітап жазған еді, оны жеке кітап етіп шығаруға мемлекетіміз ынта танытпады. Десе де оқырмандарымның орыс тілінде сауаты болғандықтан, ғаламтордағы төмендегі сілтемеден «астрономия» деген ғылым нені зерттейтінін және оның ішінде не «қызықтар» бар екенін жобалап білуге болады. Ағылшын тіліндегі астрономияға қатысты ақпараттар ғылымдық мазмұны мен сапасы жағынан әлдеқайда бір қадам алда екендігі сөзсіз. Әйтсе де, алдағы уақытта қазақтардың – Айға, Күн жүйесіндегі планеталарға, одан да әрі асып алыс жұлдыздарға, басқа галактикаларға ұшу арманы жоқ болғандықтан, қазақ оқырмандарына ағылшын тілді жазбаларды оқудың қажеті жоқ. Себебі, «Facebook»-тағы оқырмандарымның өзі айтқандай, «миымыз бен ойымызға оқу өтіп» шымшықтың миындай миымыз мұнша ақпаратты сыйғыза алмай, ортасынан қақ айырылып, шашылып қала ма деген қаупім де жоқ емес!