Молитва:
- Преблагословенная Владычице, Приснодево Богородице, Бога Слова паче всякого слова на спасение наше рождшая и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, всещедрой Матери человеколюбивого Владыки: удиви на нас пребогатые милости Твоя, и прошения наша, приносимые Тебе, скоропослушнице, ускори исполнить, вся яже на пользу, во утешение и спасение коемуждо устрояющи. Посети, преблагая, рабы Твоя благодатию Твоею, подаждь недугующим цельбу и совершенное здравие, обуреваемым тишину, плененным свободу и различными образы страждущих утеши; избави всемилостивая Госпожа, всяк град и страну от глада, язвы, труса, потопа, огня, меча и иные казни временные и вечные, Матерним Твоим дерзновением отвращающи гнев Божий; и душевного расслабления, обуревания страстей и грехоподений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Ему же подабает всякая слава, честь и поклонение, со безначальным Его Отцем и Пресвятым Духом, ныне и присно и во веки веков. Аминь.