Тропарь: Небесных воинств Архистратизи, молим вас присно мы, недостойные, да вашими молитвами оградите нас кровом крил невещественной вашей славы, сохраняюще нас,припадающих прилежно и вопиющих: от бед избавьте нас, яко чиноначальницы Вышних сил.
Молитва Архангелу Михаилу:
Святый и великий Архангеле Божий Михаиле, неисповедимыя и пресущественныя Троицы первый во Ангелах предстоятель, рода же человеческого приставниче и хранителю,сокрушивый с воинством своим главу прегордого Денницы на небеси и посрамляяй выну злобу и коварства его на земли! К тебе прибегаем с верою и тебе молимся с любовию: буди щит несокрушим и забрало твердо Святой Церкви и Православному Отечеству нашему, ограждая их молниеносным мечем твоим от всех враг, видимых и невидимых. Не оставь же , о Архангеле Божий, помощью и заступлением твоим и нас, прославляющих днесь святое имя твое: се бо, аще и многогрешные есмы, обаче не хотим в беззакониях наших погибнуть, но еже обратится ко Господу и оживлённым быть от Него на дела благие. Озари убо ум наш светом лица Божия, иже выну сияет на молниевидном челе твоем, да возможем разуметь, что есть воля Божия о нас благая и совершенная, видеть все яже подабает нам творить и яже презирать и оставлять. Укрепи благодатию Господнею слабую волю и немощное произволение наше, да , утвердившись в законе Господнем, перестанем прочее влаятеся земными помыслами и похотеньями плоти, увлекающиеся по подобию несмысленных детей, скорогибнущими красотами мира сего, яко ради тленного и земного безумне забывать вечное и небесное. Над всеми же сими испроси нам свыше дух истинного покаяния, нелицемерную печаль по Бозе и сокрушение о грехах наших, да остающее нам число дней временного жития нашего иждивем не во угождении чувств и работе страстям нашим, но во изглаждении зол, содеянных нами, слезами веры и сокрушения сердечного, подвигами чистоты и святыми делами милосердия. Когда же приблизится час окончания нашего, освобождения от уз бренного сего телесе, не оставь нас, Архангеле Божий, беззащитных против духов злобы поднебесных, обыкших преграждать душе человеческой восход в горняя, да, охраняемы тобою, беспреткновенно достигнем оных преславный селений райских, где нет печали, ни воздыханий,но жизнь бесконечная, и, сподобимся узреть пресветлое лицо Всеблагого Господа и Владыки нашего, падше со слезами у ног Его, в радости и умилении воскликнем: слава Тебе, дражайший Искупитель наш, иже за премногую любовь Твою к нам, недостойным,благоволил еси послать Ангелы Твоя в служение спасению нашему! Аминь.
Архангел Михаил- победитель супостатов
Архангел Гавриил- вестник Божиих тайн
Архангел Уриил - просветитель потемненных
Архангел Иегудиил - утверждает трудящегося человека ради славы Божией
Архангел Салафиил - молитель Бога о человеках
Архангел Рафаил - врач недугов человеческих
Архангел Варахаил - податель Божьего благословения