Doom запустили на калькуляторе с батарейкой из 700 картофелин. Эту новость мы перевели на литературный даргинский — язык, которым, согласно переписи населения 2010 года, владеют 485 тысяч человек, преимущественно в северо-восточной части горного Дагестана.
Сделали мы это в рамках проекта «Языки России», который создается при поддержке АНО «ИРИ».
Американецли Doom гьалабихьиб картошкализибад кайсуси хутIличил бузуси калькулятор. 4,5 вольтла ибкьдеш ва вецIани миллиамперлизиб хутIла цIакь касес багьандан, 700-цад картошкализибад батарея цалабяхъес чебуркъуб. Ахтардила видео кабяхъили леб YouTube-личиб.
Чула хIянчилис марти, ил шайчиб гъирачебли бузути адамтани гьанналис гIяхIцад дусмазиб бузесиули саби 1993 ибил дусла гьарли-марси Doom, илис хасхIедарибти гIягIниахълумачиб. Буралли, электроника илцадра хъярхъли гьалабяхI башули саби, хIятта электронный папрусунази бархли микрокомпьютер кабилзули саби, сунелара имканти урчIемцIали ибти дусмала бехIбихьудла компьютертачил цугдуцес ва хIязтали виркьес вирути. Doom гьанналис гьалаб бузесаибсири клавиатурала декIарси клавищаличиб, Porshe 911-личиб ва хьунул адам дурхIялис раилил ахтардибируси тестличиб булан.
Иличил барх, тамашаласили бетаэс бирар компьютерцун ахIи, хутI кайсуси хьулчира. Дунъяличиб цаибси батарейкали хутI дурайусири кислотала ва цинкла бархбасуначибли. Кислотала хьулчи илцад-декIар мягIничебси ахIен, сенахIенну ил касес вируси сай цIедешлизибад, овощуназибад яра зукьити гIянжилизибад бархли. Иличила ва црахIилти тяхIуртачила чебетаахъили нушани бурибсири «Гьарли-марли шиниша хутI» бикIуси материаллизиб.
Цаладяхъибти штатуназивадси YouTube-каналла автор Equalo-ни Doom бузесаиб калькуляторличиб, сунезибра гIядатлати батарейкабала мерличиб цIакь кайсуси картошкала бутIа кабизурси. Картошкала тIем зукьиси хIебиалра, илизир кислотаби лер, буралли, лимонна, гIинцбала ва фосфорла. Сунела бузерилис марсили картошкализи цинкла гIябул ва дубсила монета къуздариб, иличибли 0,9 вольтлацад абкьдеш ва ца миллиамперла хутIла цIакь касиб.
ХIялумцIанни гьаланачибал Doom кабизурси Raspberry Pi Zero микрокалькулятор бузесаэс багьандан, 4,5 вольт ва 100-120 миллиампер хIяжатти сари. Ил сабабли дахъал картошка батареялизи цаладяхъес чебуркъуб: 8 мурхьдешлис ва 90-цад бягIудешлис, лерилра дарх картошкала 750 бутIацад. Илгъуна батареяли 90-цад миллиампер гиб, илди калькулятор бузахъес диули ахIенри. Картошка дуб-дубли тIутIукабирулри, ва чеимцIали кьадар халабаахъес замана аги. Илала мерличиб сунела бузерилис марсили гIягIниахъала барсбарес пикрибариб, ва Doom Ti-84 Graphing Calculator-личи кабизур, сунесра хIянчилис 30 миллиамперцун хIяжатдиркуси. Гьалаб-гьалабси тяхIярлизибад декIарбулхъули, ил калькулятор гьамадли биахъес телевизорличил бярхбяхъес асубируси ахIен, ва ил багьандан хIяз барес чебуркъуб кабизурси монохромный микродисплейличиб.
Тамашала гIягIниахълумала кумекличил Doom-лизиб хIязцун ахIен барес асубируси. Мисаллис, ца программистли робопылесос бурсибариб сунени умубируси квартирала хьулчиличиб хIяз барахъес карта алкIахъес.
Василий Зайцев
Шурбатурси - Салимат ГIялиева