Майӈыв’уйвык Москва театрак «Геликон-опера» нэйилнэв’ ойпакмето йингычголав’гиӈыкъет этнокультурный этгиӈо то йинмэлтвэвык томгылг’атгиӈо гамгаваятэн Россияк «Гычгочав’гиӈын ваятэн». Ӈыяӄмыллыӈэн этгиӈэпыӈ янотычг’о ныг’аллай мыкыӈ 30 г’уемтэв’илг’у. В’утку опта нанойпакметын вэтатылг’ын иччетык яйтаӈык культуракенав’ пыттоӈо Камчаткакен гынунык ваяткенав’ этгиӈо М. Беляева.
Ынкыӈ нэйилын ойпакмет «Яйтаӈгиӈыкъет то йингычголав’гиӈыкъет культура ваятэн Россияк».
«М. Беляевынак уйӈэ ятан анчоччымав’ка ангытыткогиӈо, ынан кутилиӈнин научно-исследовательский вэтгиӈо. 2011 гэвэгиӈык гынунык гантоӈвав’лэн иччет, меӈин ӈывой вэтатык яйтаӈык ваятэн культуракенав’ пыттоӈо. Ыннин китыӈ нымэйиӈӄин в’эннятгиӈын тит яйтаӈык культуракенав’ историяв’ ӄулин ёнатылг’ыйикыӈ»,- эвыӈ пыче итылг’ын инэллэчг’у культуракен этгиӈэпыӈ крайик В. Пегуров.
2013-2017 гэвэгиӈык иччетэ нэтэйкынэв’ 26 лайвыгиӈо то наёг’ынав’ 44 нымъёлго Корякский округык. Ыннею специалистов’ эллай Тигильский, Карагинский, Олюторский то Пенжинский районык. Опта нэтилинэт Быстринский то Мильковский районыт. Ычгынан накалинав’ ӄымек 200 г’уемтэв’илг’у, меӈиныйик лиги нэкулӈыӈын чининкин культура. Гантоӈвав’лэнав’ мыкыӈ 30 каликалу, нэтэйкынэв’ 1600 дискав’ аӈаӈъялг’эн, панэнатвылг’эн, лимӈылитколг’ин то ӄуччев’.
***
Аӄачыг’ычгиӈыкъет юнэтылг’у Камчаткак инэллэчг’э наког’айӈав’ӈывоӈнав’ тывык чининкинэв’ пыӈлов’ дистанционный этгиӈэпыӈ гамга эналлачг’ыйикыӈ Инэллээччатыӈӄо Камчатский крайик. Эмэлкэ такалиӈык каличитванэтыӈ «Камчатка нымэлг’эв’ валг’ын». В’утку калик яӄ пыӈлов’ котвалаӈ. Ынняӄ инэллэчг’э наятвыӈ титэ йитыӈ онлайн-йиг’этвылӈыгиӈын. В’отэныӈӄо ымыӈ ыявак айгытӄыӈӄал ёнатылг’ыйикын еллайкэ энапӈылав’гиӈо эналлачг’ыӈ ныплэпӄэнав’.
Эчгыпо йинчоччымав’нэн С. Тынанто.