Эчги юнэтылг’э Кольпачык наӈвонав’ гитэк 10 кытаван итылг’у ТВ канало виткукин мультиплексакен цифровой эфирный телевидениян (Виткукин Россия 1+региональный эчгыпо то панэнатво ГТРК «Камчатка», Матч, НТВ,Мыллыӈӄав’кен канал, Россия Культуран, Россия-24+ региональный панэнатво ГТРК «Камчатка», ОТР, ТВЦ, 3 радиоканалав’- Радион Россиякен,Маяк, Эчгыпо- ФМ.
6 кытэплёйиг’илгык инэллэчг’э Камчаткак Солодовынак видео-в’аняватгиӈэпыӈ поздравиннин юнэтылг’у Кольпачык в’утиныкъйит.
«Инг’э мытыплитколан ыннин вэтгиӈын. Амъел мыччавэталлайкэ тит ыяваӈӄал итылг’ык районык нэг’уевын мультимедийный этгиӈын. Нытгымг’ав’ вэтатэ иччет цифровой йиплэпав’гиӈэпыӈ, связик то ымыӈ коммуникациякен РФ то инэллэчг’ын Гынункин Павел Хилов. Ынно ӈынвыӄ вэтатэ тит нэг’уевын ынниг’ан валг’ын Телевидениян Кольпачык. Ымыӈ ею ийкыӈ нымэлӄинэв’, то тыкопоздравинӈынав’, мыев’ г’ояв’лай нытуйӄинэв’ цифровоё этгиӈо»,- эвыӈ В. Солодов.
28 в’уйвык Корякский округык еппы итке эфирный телерадиовещаниян. Янот опта уйӈэ атвака ыннин Кольпачык, миӈки коёналаӈ 565 г’уемтэв’илг’у.
***
Камчаткак наӈвонав’ танвэтгыӈгиӈо тэнмэпыӈ краевой бюджетыкъет 2021 гэвэгиӈэтыӈ.
«Танвэтгыӈгиӈо когалалаӈ омакаӈ тыӈивылг’ин ваятэн Законодательный умекетык крайик то инэллэчг’ык краевой Инэллээччатыӈӄо. Ынниг’ан валг’о танвэтгыӈгиӈо еллаӈ мыллыӈэн»,-эвыӈ А. Кузнецов.
«Бюджет ганчаччымав’лэн иччыэтгиӈык, мыев’ китыӈ тыг’ылгиӈын аӄачыг’ычгиӈа. В’отэныӈӄо ӈаеё яёг’ыӈгиӈо, меӈию уйӈэ итке социальный нэчвинэв’ пылв’ынтыкъет. Ымоӈ пылв’ынтогиӈо крайик еллайкэ 78,1 миллиардав’, ыннею келлаӈ мыкыӈ 1,1 миллиардав’ мыкыӈ галалг’ыгэвэгиӈык. Бюджет китыӈ социальный. Энанмалав’гиӈэпыӈ, энангыёлав’гиӈэтыӈ, спортайтыӈ то культурайтыӈ 2021 гэвэгиӈык ганчоччымав’лэнав’ мыкыӈ 200 миллионов’ , ӈэвэӄ гитэк галаг’ыгэвэгиӈын»,- эвыӈ А. Кузнецов.
Эчгыпо йинчоччымав’нэн С. Тынанто.