Дүйім жұртқа Абайды таныту арқылы өзі де танымал болған тұлғаның бірі Мұхтар Әуезов екені айтпаса да белгілі. Жалпы қазақ зиялыларының арасында Абайды зерттемеген, Абайға шығарма арнамаған адам жоқтың қасы. Абайдың мол да мағыналы мұрасы қаншама таланттың шығармашылығына шабыт берген. Қазақтың тұңғыш суретшісі, кескіндеме өнерінің шебері Әбілхан Қастеев үшін Абай тақырыбы қашан да маңызды болған. Қылқалам шебері жас Абайдың портретін жазған алғашқы және жалғыз суретші. Қазақ бейнелеу өнерінде бозбала Абайдың бұдан басқа портреті жоқ. Суретші аталған туындысын 1945 жылы жазған. Мұхтар Әуезовтың «Абай жолы» романының бірінші томын оқып болған соң Қастеевтың Абайға деген қызығушылығы арта түскен. Аталған композицияда Абайдың медреседе оқып жүрген сәті көрініс тапқан. Үстіндегі жасыл шапаны, басына киген тақиясы мен қолына ұстаған кітабы керілген кенеп бетінен орын алған. Қастеев туындысында бір түсті фонды қолдану арқылы көрерменннің бар назарын тек Абай образына бағыттауды көздеген. Алысқа ой сала қараған жанарынан бозбала Абайдың даналығы, халқының болашағына деген алаңдаушылығы байқалады. «Абай жолы» романының бірінші томындағы бала Абай образының негізінде жазылған туындыны суретші – Мұхтар Әуезовке көрсетіп, пікірін сұрайды. Қастеевтың жұмысы жазушының оң бағасына ие болған. Қылқалам шеберінің шығармашылығы тек осы бала Абайдың портретімен шектелмейді. Сондай-ақ суретші егде жастағы Абай портреттін жазған. Мысалы, «Абай киіз үй жанында» немесе «Абай жайлауда» деген қарандашпен салынған портреттерін айтуға болады.
