368-ші Қара пайым-сөз: Кәрі арыстан ішерін ішті, жеді – көкжиекте оны өлтіретін жас арыстан көрінді...

Осы әзірде ғаламтордан Африкадағы саваннадан түсірілген арыстандар үйірі (прайд) туралы фильмді қарадым. Жастықтың буымен өз қарындастарына, әпкесіне немесе анасына шауып қоймас үшін үйірінен аластатылған екі жас арыстан басқа үйірге келіп, кәрі арыстанды талап, үйренген үйірінен қуып жібереді. Аналық арыстандар жүректері қаншалықты ауырса да, жас арыстандардың кәрі арыстанның ұрығынан туылған барлық күшіктерді шайнап өлтіріп жатқанына қарап тұрады. Бұл «табиғи іріктеу» (естественный отбор – natural selection) деп аталатын табиғаттың қатал заңы. Кәрі арыстан саваннаны кезіп жүріп, табылған өлексені шайнайтын тісі қалмағандықтан, ең соңында кепкен тулақтай ырсиып аштан өледі. Қылшылдаған жас кезінде осы кәрі арыстан да, танымайтын бір үйірге келіп, сондағы кәрі арыстанды талап өлтіріп, оның күшіктерінің бәрін шайнап өлтірген еді. Енді міне, сол зобалаң өз басына келді. Құдайдың құдіретімен, әлемдегі тіршілік, өмір, саналы-санасыз хайуандардың арасында осылайша реттеліп отырады. Осыдан 800 жыл бұрын өркениеті өркендеген әлемге әлгі екі жас арыстан сияқты көк Түркілер империясы («Шыңғысхан империясы» деген атау, дұшпандарымыздың шындықты бұрмалау үшін ойлап тапқан атауы) келіп, күллі Евразияны билеген еді. Одан соң жоғарыдағы айтқан іріктеудің заңы бойынша арыстанның күшіктері сияқты таланып өлді. Бірақ тірі қалған бірлі-жарым күшіктер өсті, күшейді. Күш – атасын танымағанға танытады, кәрі қулық бәрібір күшке қарсы ешнәрсе жасай алмайды. Әлемнің үстінен мәңгілік қарап отырамыз деген ақ нәсілдердің уақыты өтіп барады. Олар іштей іріп-шіріп, азып-тозды. Қазіргі уақытта олардың қауқиып тұрған жүндері ғана қалды. Таяуда жамылып отырған қауқима терілері сыпырып алынады. Одан соң 200-300 жылдай түркі халықтарының айбынды заманы қайта туып, соншалық уақыт өткенде түркілер де іріп-шіріп, олардың орнына есін жиған басқа халықтар келеді. Құдай-ау, осылайша аумалы-төкпелі дүние сан алмасып, ахиретке дейін жалғаса береді...