Professional boksda mag‘lubiyatsiz odimini davom ettirayotgan Shohjahon Ergashev “S-Jam” edvayzorlik kompaniyasi bilan shartnoma tuzdi. Mazkur tashkilot promouterlik kompaniyasidan farqli ravishda bokschilarga o‘ziga xos maslahatlar beradi va kelajakdagi janglarini muhokama qilib, birgalikda qarorlar qabul qiladi. Bir so‘z bilan aytganda, sportchining faoliyatiga ijobiy taraflama katta ta’sir ko‘rsatadigan kompaniyadir.
Ushbu kompaniya asoschilaridan biri Adam Morale yurtdoshimiz bilan hamkorlik qilishdan xursand ekanligini ta’kidlab o‘tgan.
“Shohjahon Ergashev 18-0, 16 nokaut qayd etgan talantli bokschidir. Qolaversa, yuqori reytingli va menejeri Oleg Bogdanov bilan birgalikda ajoyib ish olib bormoqda. Biz uning salohiyatini to‘la ochishda yordam beramiz va u bilan ishlashdan xursandmiz”, - dedi Morale.
Shu o‘rinda aytib o‘tish joizki, ushbu kompaniya bilan anchagina mashhur Jo Joys, Lerron Richards kabi bokschilar ham hamkorlik qiladi.