364-ші Қара пайым-сөз: Қара аспанды жерге түсіргім келмесе де, сол құрғыр құлап келе жатқандай

Күнде кеш болғанда оңтүстік жақтағы балконымның маңдайшасынан Есекқырған (Юпитер) мен Қойшының қоңырқай жұлдызы (Сатурн) жылтылдап көрінуін неге жорырымды білмей жүрген едім. Түн ортасы болғанда әлгі екі саяқ (планета) батысқа қарай жылжып, екеуінің орнында қызылдығы көзге ұрған Қызыл жұлдыз (Марс) пайда болатын болды. Енді міне бұл үш жұлдыздың құпиясы ашыла бастаған сыңайлы. Бүгін Үкіметіміз шамасы төмендегі жазбада келтірген «сыртқы қарыздың» күрт арту себебімен «бұдан былайғы жерде «Тәжі-дерт» індетін жұқтырған және осы індеттен қайтыс болған медициналық қызметкерлерге ешқандай қосымша қаражат төлемейміз» деген шешім қабылдапты. Ғаламтордағы тура осы хабардың астына «елімізде Тәжі-дерт» індеті мен соның белгілері бар пневмонияны жұқтырғандардың саны 20 пайызға артты» деген келесі ақпарат орналасыпты. Логикасы дұрыс жұмыс істейтін адамдар: «Оу, үкіметтегі товарищтер, дендерің сау ма өзі, ақша төлемесеңдер, әлдеқашан сүйегі қурап қалған Гиппократтқа берген антына берік, жалаң патриотизммен жұмыс істейтін ақымақ дәрігерлерді қайдан таппақсыңдар?» деп айқайлап жіберері сөзсіз. Себебі, әлгі 20 пайыздың арғы жағында мүмкін осы арамызда отырған баз біреулердің анасы немесе атасы жатқаны анық. Ендігі қалғаны қарттарымыз бен жастарымыздың өлімімен ақша үнемдеу ме? Миым бастығырылып, бұдан басқа да кеңірдегіме кептеліп қалған сөздерді айтуға аузым бармай тұр. Қысқасы не істерін білмей артымен сүңгіген мемлекет те шарасыз, қазақ та шарасыз, бұл шарасыздықтар енді күн сайын көбейе түспесе, азаймайтынын сезгенде, арқаңда құмырысқалар жыбырлай бастайды. Алдымызда қылышын сүйретіп қыс келеді, ол не әкеледі, ешкім де білмейді. Қысқасы, биылғы Тышқан жылы да, алдағы Сиыр жылы да, қазаққа жайлы болмайтын түрі бар, белді буып бекем болайық!