Kecha qiziq voqea bo'ldi, Oʻzbekiston telekanalidan "MUNOSABAT" koʻrsatuvini ko’rayotgandim. Ko’rsatuvda kuz qish mavsumiga tayyorgarlik, qishda aholiga gaz, elektr energiya, issiq suvning yetkazib berishdagi kamchilik va yutuqlari haqida yaxshi gaplar, tortishuv va munozaralar bo’layotgan edi. Maza qilib ko’raman deb tursam chiroq oʻchib qolsa boʻladimi. Mana sizga latifa. U yoqda Quddus aka jon ko’ydirib ko’rsatuvlarida xalq tashvishi va muammolarini ko’tarib chiqishga va bu og’riqli nuqtalarimizdagi muammolar tegishli odamlargacha yetib borishiga harakat qilib yotgan bir paytlarida, bu yoqdagilarga “Eksa bahor, uzsa kuz” bo’lib yotipti.
Biz o’rganib ham qolganmiz. Shu soha mutasaddilari Toshkentda qanaqa ishlashadi bilmadimu, lekin biz yashaydigan chekka hududlarda kuz-qish mavsumiga tayyorgarlik, KUZ-QISH mavsumida bo’ladi. Eslayman bir necha yil oldin mahalliy telekanalda shu mavzuga aloqador bir ko’rsatuv bo’lgan edi. Bir mutasaddi xodimga jurnalist “Bizga juda ko’p shikoyatlar kelgan, aholiga elektr energiya yetkazib berishda juda ko’p uzilishlar bo’layotgani haqida. Gaz esa umuman yo’q ekan. Bu muammolardan xabardormisiz va qanaqa choralar ko’rilayapti?” deb savol berdi. Akaxonimiz esa fevral oyida efirga uzatilayotgan ko’rsatuvda, muammolarni deyarli hal qilganliklari va 2-3 haftada elektr energiyasi uzluksiz yetkazib berilishini aytyaptilar. FEVRAL oyida. 2-3 haftadan keyin bahor kirib kelib bo’ladiku. Bizning iqlimimizda bahorning ilk kunlaridanoq havo iliq-issiq bo’ladiku. Bizga gaz va elektrni qishda beringlar, soatlab uzilishlarni yozga ko’chiringlar hech kim sezmaydi ham. Hamma dalada bo’ladi, ishda bo’ladi.
Mana yaqinda 3-4 kun oldin yangiliklarda ko’rsatishipti. Bir yigitga chinor daraxtini kesganligi uchun 35 million jarima yopishtirishipti. O’zim ko’rmadimu lekin, agar daraxtni o’tin qilib yoqib uyini qishda isitish maqsadida kesgan bo’lsa, demak jarimani o’sha hudud rahbariga to’latish kerak. Chunki ko’p hududlarimiz qish u yoqda tursin kuzga ham tayyor emas. Bu fikrga kecha 2 soat chiroqni uzib qo’yishganlarida keldim. Hali kuzda shunaqa o’chayapti, bu degani qishda umuman yo’qda chiroq.
Muammoni birgalashib hal qilish kerakligini tushunaman. Balki ba’zi muammolardan kattalar bexabardir degan fikr ham keladi gohida. Lekin qachon aholi yillab paysalga solib kelinayotgan muammolarini, televideniya xodimlarini Toshkentdan chaqirtirib, matasaddilar oldiga olib borishganda. Mutasaddilardan BIR XIL javob eshitamiz. “DASTURGA KIRITILGAN”. Qanaqa dastur ekan u faqat kiritiladi?
Xullas ko’p gapirib yubordim. Borib undan ko’ra eski dvijogimni tozalab u yog’ bu yog’ini to’girlab qo’yay, kuz qish mavsumiga tayyorgarlik-da!
