Ускалмачаная, абтрапаная, злая Баба Яга аднойчы навучылася ператварацца ў невідзімку (гэтаму навучылі яе лютыя чараўнікі). Яна залятала ў кватэры і зламыснічала: схопіць са стала кубак і лусне аб падлогу, яшчэ і патанцуе на асколках... Ці пасварыць брацікаў і сястрычак аба залезе ў вушка дзіцяці і шэпча яму, што трэба ўкрасці ў мамы цукеркі. А аднойчы яна заляцела ў пакой, дзе толькі што прачнулася нехлямяжая дзяўчынка, і захацелася ёй зрабіць малой штосьці такое-такое-такое... І раптам яна заўважыла, як з калматай, з заспаным тварам непрыгожай дзяўчынка пачала ператварацца ў прынцэссу. А як гэта адбылося - паслухайце.
Малышка ўключыла прайгравальнік і паставіла пласцінку з вясёлай мелодыяй, зрабіла зарадку, і ад гэтага апошні сон саскочыў з тварыка і ўцёк у куток. Затым дзяўчынка памылася халоднай вадой, шчочкі яе паружавелі, а ў вачах зайгралі вясёлыя агеньчыкі. Яна расчасала кудлатыя валасы і сабрала іх у "хвосцік", падобны да вавёрчынага. Адпрасаваная ж сукенка ператварыла яе з маленькай Бабкі Ёжкі ў прынцэсу.
Баба Яга таксама вырашыла стаць красуняй і пачала паўтараць дзеянні дзяўчынкі. І, калі з люстэрка на яе паглядзеў нечы воблік - вясёлыя вочкі, ружовыя шчочкі, хваля валасоў - яна засмяялася нібы званочак зацінькаў. І захацелася ёй зрабіць нешта такое цудоўнае людзям, што цяпер, калі ператваралася ў невідзімку, яна прымірала тых, хто сварыўся, пераварочвала на патэльні скваркі, каб не падгарэлі, дапамагала малышам вучыцца хадзіць, а малятам-дашкалятам - прыгожа маляваць. І калі табе, дзіцятка, раптам захочацца зрабіць нешта светлае і добрае, ведай: Баба Яга-невідзімка падказала табе гэта...