336-шы Қара пайым-сөз: Кіріспе: «Тоғыс есебін» не үшін үйреніп алғандарыңыз дұрыс болады?

Отыз бес жыл бойы әуелі өзім зерттеп, толық түсініп алған соң, білгенімді ынта танытқан австралия ғұламасы Питер Мейерге үйретіп, көп ұзамай ол да түсініп алды. Еліне қайтатын қоштасар сәт келген кезде, ол қолымды қысып тұрып: «Мына ғажайып күнтізбені жартылай жабайы көшпенділер ойлап тапты дегенге әлі сене алар емеспін. Бірақ бұл күнтізбені расында да сендердің ата-бабаларың ойлап тапқанына расында да сен арқылы көзім жетіп тұр» деген еді. Әр сөзін жүз ойланып сөйлейтін еврей шал осындай баға берген «Тоғыс есебін» түсініп алғандарыңыз өздеріңізге жақсы. Ол шал өзінің не айтатынын жақсы білетін шал. Ғайыптан тайып болып ажалым келіп өліп қалсам, «Тоғыс есебі» де менімен бірге өле ме деген қаупім де жоқ емес. Менің миымда тұрған ғылымды Питер сияқты шәкірт болып үйреніп алудың орнына, бұлбұлдың әсем әуеніне сын пікір айтқан қара қарғалар сияқты қарқылдаған қазақтың құзғын ғалымсымақтарынан көрі, маған Сіздер жақын болып тұрсыздар. Осыны дұрыс түсініңіздер және аз-аздап түсіндіретін дәрістерге қатысып, түсінбеген жерлеріңізді ұялмай сұрап, ата-бабаларымыздың расында да ғажайып ежелгі ілімін үйреніп алыңыздар. Ата-бабаларымыз «керек тастың ауырлығы жоқ» деп тегін айтпаған, әр тасы алтынға бергісіз мұндай тегін дәрісті дені дұрыс ешбір ғалым, ешқашан да тегін үйретпейтіні бәріңізге де мәлім болар деп ойлаймын.