335-ші Қара пайым-сөз: Ертеңнен бастап, уақыт болып жатса «Тоғыс есебін» түсіндіруге кірісемін

Бұған дейін «Тоғыс есебіне» қатысты Ахмет Өмірзақ бауырым: «Тереңірек түсіндіріңіз. Бұл есептердің мәні не екенін біле жүргеніміз жөн» десе, Нұртай Ерназар бауырым: «Қалдархан, бұл саланы зерттемегендіктен болар, шынын айтсам, түк ұқпадым, талдап бермесең» деген еді. Бірақ қазақ халқының бүгіні мен болашағы туралы жазбалар жазып, бұл екі өтініш туралы ұмытып кетіппін. Кейіннен Айжарық Ерали бауырым: «Қалеке, бұл тақырыпты (Тоғыс есебін) кеңірек өз қазағымызға жария ету керек қой. Билік түсінбеді деп өкпелеу дәл қазір ретсіз. Олардың өз қызығы өзінде. Ел естісін, білсін. Қолдайды. Бір күні әлем мойындағанды біз де мойындаймыз. Келер ұрпақ өзіне қажеттісін таңдайды» – деген ойымен бөлісіпті. Айтатыны жоқ, орынды уәж. Бірақ ғылым докторлары, профессорлар түсіне алмаған бұл күрделі тақырыпты жай адамдар түсіне алар ма екен деп күдіктеніп отырмын. Жарайды, түсіндіруді бастайын. Сіздер сұрақ қойып отырыңыздар. Егер сұрақ қоймасаңыздар, онда ешкім тыңдап отырған жоқ деп ойлаймын. Қазақ «тыңдамаған сөз жетім» дейді ғой, әрі қарай жоғарыдағыдай өтініш жасамаңыздар. Өйткені, шын айтам, қызметімнен келген жұмыстар толып тұр. Мен үшін солармен шұғылданғаным әлдеқайда пайдалы, себебі ол жұмыстарым үшін мекемем жалақы төлейді.