330-шы Қара пайым-сөз: Қазақты қан қақсатқан «түлкі бұлғақ заман» деген қорқынышты сөз бар

Бүгін таңертең жазған «Мектептегі – екі сағат, еліміздегі – екі билік, есті тандырып барады» деген жазбама Karshiga Alimgazina қарындасым: «Негізі, өте қорқынышты нәрселерді айттыңыз Қалдархан аға! Ақырында, «ту талақайымызды шығарып» бөліп әкетпесе болды! Не істеп, не қойып жатқандарын түсініп болудан қалдық! Тек Алла жар болсын, қазаққа!» деп пікір жазыпты. Бұл сөзді негізі жігіттер жақтан күткен едім. Сәл бірдеме болса «тауықтың миындай миы бар төмен етекті әйел ғой» деп әйелдерді кекетіп шыға келетін жаман әдетіміз бар. Әйтсе де әйелдің ақылы мен көрегенділігі кейде еркектен басым түсетінін Қаршығаның сөзі дәлелдеп отыр. Мына түбіміздегі қырғыздардың ішінде екі апта бойы болып жатқан қанды жанжал ақыр түбінде қырғыздарды екіге бөлуге қарай кетіп барады. Қазақ қоғамы сырт көзге іштей тыныш сияқты болып көрінгенмен, «түлкі бұлғақ» бір қиямпұрыс, халыққа жайсыз саясат жүріп жатыр. Ішім бір жамандықты сезеді, бірақ осы ойымды Қаршыға қыздың: «Ақырында, «ту талақайымызды шығарып» бөліп әкетпесе болды!» деп тап басып айтып отырғанын көрмейсің бе. Палестиналық Али Абу Иссам деген араб досымнан өткен ғасырдың 90-жылдары «Сендер мемлекеттіктеріңді қалай жоғалтып алдыңдар?» деп сұрағаным бар. Сонда ол ауыр күрсініп: «Кешке Палестина жерінде ұйықтадық, таңертең Израйль жерінде ояндық» деп қысқа жауап берген еді. Қазақ осылай ұйықтай берсе, палестиналықтардың басына туған жағдай қазақтың да басына тууы мүмкін екенін ішім сезеді. Бірақ одан не пайда, нағыз қимылдайтын кезде қазақ қорылдап ұйықтап жатыр...