Bugun Jasurning debyutini ko‘ramizmi?
Futbol 18 oktabr, 2020, 10:00 0 Teglar:Jasurbek Jaloliddinov
|
Tambov
|
LokomotivHamma kutayotgan debyut
Rossiya premer-ligasining 11-turida “Tambov” jamoasi safar uchrashuvida “Rotor” mehmoni bo‘ladi. Har ikki jamoa ham o‘zbekistonlik futbol muxlislari uchun begona emas. Sababi, O‘zbekiston milliy terma jamoasi tarixidagi eng zo‘r to‘purar Maksim Shatskix ayni paytda “Rotor” murabbiylar shtabida faoliyat yuritayotgan bo‘lsa, Rossiya chempionatidagi eng yosh legionerimiz Jasur Jaloliddinov yaqinda “Tambov” safiga qo‘shildi.
Rossiya chempionatining har ikki ligasida to‘p tepayotgan vakillarimiz o‘z jamoalari safida asosiy tarkibdan o‘rin olib ulgurgan. Faqatgina 18 yoshli Jasur Jaloliddinov “Lokomotiv”da debyutini nishonlay olmadi. Moskvalik “temiryo‘lchilar” asosan tajribali futbolchilarga ishonch bildiryapti. Legionerlarga qo‘yilgan limit tufayli Jasur o‘rnini o‘zidan katta charm to‘p ustlariga bo‘shatib berishga majbur bo‘ldi.
Avvaliga iste’dodli yarim himoyachining “Bunyodkor”ga qaytishi kutilgan bo‘lsa-da, amalda boshqacha bo‘lib chiqdi. Jaloliddinov ijara asosida “Tambov”da o‘ynaydigan bo‘ldi. Premer-ligada qolish uchun kurashayotgan bu klub yozgi transferlar oynasining oxirgi o‘n kunligida bir necha yangi futbolchilarni o‘z tarkibiga qo‘shib olishga ulgurdi.
Jasur Jaloliddinov tambovliklar uchun o‘ynaydigan bo‘lsa ham, uning maoshini “Lokomotiv” to‘lashi aytilmoqda. “Tambov” o‘zbekistonlik legionerdan tashqari, “Arsenal”dan belaruslik Maksim Volodko, “Orenburg”dan Vitaliy Shaxov, “Ural”dan armanistonlik Varazdat Aroyan va “Parij” klubidan ganalik Muhammad Rabiuni o‘z safiga qo‘shib oldi. Murabbiylar bu futbolchilar tarkibda raqobatni kuchaytirishiga ishonmoqda. Shuning uchun, bir necha o‘yinchiga ruxsat berib yuborildi.
“Rotor” va “Tambov” uchrashuvi autsayderlar derbisi, deb baholanmoqda. Bu jamoalar ilgari Milliy futbol ligasi doirasida o‘zaro to‘rt marotaba duch kelgan. Uchta uchrashuvda tambovliklarning qo‘li baland kelgan bo‘lsa, volgogradliklar bir marotaba zafar quchgan. Ular hech qachon durang o‘ynamagan. Demak, bu gal ham mezbonlar uchun o‘ta noqulay raqib hisoblangan “Tambov”ning imkoniyat yuqoriroq baholanmoqda.
Maktsim Shatskix katta murabbiy bo‘lib ishlayotgan “Rotor”ning premer-ligaga kuchi etmayotgani yaqqol ko‘rinib qoldi. Chempionatning uchdan biri yakunlangan bir pallada Milliy futbol ligasi g‘olibi sifatida elitaga qo‘shilgan “Rotor” birorta g‘alabaga erisha olmagan yagona jamoa bo‘lib qolmoqda. Ular hisobida atigi uch ochko bor.
Bu uchrashuv o‘zbekistonlik muxlislar uchun Jasur Jaloliddinovning debyuti yuz berishi mumkin bo‘lgan bahs sifatida ahamiyatlidir. Zero, “Tambov” iste’dodli yarim himoyachini zaxirada olib o‘tirish uchun taklif qilmagan. Ular Jasurdan ko‘proq foydalanib qolishi kerak.
“Tambov” varianti Jasur uchun ham ayni muddao. Uni “Lokomotiv” klubiga transfer qilgan mutaxassis Yuriy Belous Jasur mahorat bobida portugaliyalik mashhur futbolchi Joau Mariudan ustun ekanini ta’kidlagan edi. Jaloliddinov uning gaplari haqiqat ekanini isbotlab qo‘yishi kerak. Umuman olganda esa, Jasur Rossiya futbolida o‘z o‘rniga ega bo‘lish uchun har qanday jamoada nimalarga qodirligini namoyish qilishi talab etiladi. O‘zini ko‘rsata olsa, Eldor Shomurodov va Oston O‘runov singari yanada kuchli jamoalar e’tiborini qozonadi. Aks holda, Rossiya chempionatiga katta umidlar bilan ketib, oxir-oqibat milliy chempionatimiz yoki kuchsizroq ligalarga qaytganlar ham ko‘p bo‘lganini inobatga olib, ularning qatoriga qo‘shilib qoladi...
“Rotor” – “Tambov” uchrashuvi Toshkent vaqti bilan 16:00da boshlanadi.