Chempionlik taqdiri hal bo‘lmoqda. Muhim o‘yinda Yaxshiboev jamoasidan g‘alaba kutamiz!
Futbol 18 oktabr, 2020, 12:22 1 Teglar:Jasur Yaxshiboev
|
ShaxtyorHal qiluvchi palla
Bugun Belarus chempionati hal qiluvchi pallaga kirdi. Uzoq vaqt peshqadamlik qilgan “Shaxtyor” oxirgi uchta o‘yindan ikkitasida muvaffaqiyatsizlikka yuz tutib, asosiy raqobatchisi BATEni oldinga o‘tkazib yubordi. To‘purarlar bahsida peshqadamlik qilgan Jasur Yaxshiboevga barqarorlik etishmasligi ortidan BATE hujumchisi Maksim Skavish unga tenglashib oldi. Har ikkisi hisobida 13tadan gol bor.
Soligorskliklar 26-tur uchrashuvini o‘z maydonida Belarusning eng mashhur klubi “Dinamo-Minsk” futbolchilariga qarshi o‘tkazadi. Bu o‘yinda mezbonlarni faqat g‘alaba qoniqtiradi va o‘yin ular kutgan natija bilan yakunlansagina, bitta o‘yin kam o‘tkazgan “Shaxtyor” birinchi o‘rinda turgan BATE bilan uchrashuvlar va ochkolari sonini tenglashtirib oladi.
O‘z navbatida, BATEni ham qiyin uchrashuv kutib turibdi. Borisovliklar to‘rtinchi pog‘onada turgan “Isloch” mehmoni bo‘ladi. Mezbonlar g‘alaba qozongan taqdirda sovrinli o‘rinlar uchun kurashga qo‘shiladi. Shu o‘rinda, ayni paytda ikkinchi o‘rinda turgan “Nyoman”ning kutilmaganda o‘z muxlislari ko‘z o‘ngida autsayderlar jamoalardan “Gorodeya”ga yutqazib qo‘ygani, “Shaxtyor”, BATE va “Isloch”ga qo‘l kelganini ta’kidlash lozim. “Nyoman” esa 26-uchrashuvida ochkolar sonini 50 taga etkazib, birinchi o‘ringa ko‘tarilib olish va chempionlik uchun kurashish imkoniyatini qo‘ldan chiqardi.
Demak, 26-tur doirasida “Shaxtyor” – “Dinamo-Minsk” va “Isloch” – BATE uchrashuvlari o‘ta muhim ahamiyatga ega.
“Shaxtyor” va “Dinamo-Minsk”ning o‘zaro raqobatida kichik ustunlik Yaxshiboev jamoasi tomonida. Oxirgi sakkizta uchrashuvning uchtasida soligorskliklar zafar quchgan, to‘rtta bahsda kuchlar teng kelgan va “Dinamo-Minsk” bitta o‘yinni o‘z foydasiga hal qilgan. Bu yilgi chempionatning birinchi davrasida “Shaxtyor” futbolchilari Minskdan kichik hisobdagi g‘alaba bilan qaytgan edi.
Chempionlik uchun kurashda “Shaxtyor” va BATE o‘zaro raqobatlashayotgan bo‘lsa, to‘purarlar bahsida shu ikki jamoa hujumchilari – Jasur Yaxshiboev va Maksim Skavish kurashi davom etadi. Bundan bir necha tur oldin bu yilgi to‘purarlar poygasida o‘zbekistonlik futbolchining imkoniyati juda yuqori baholangan bo‘lsa, endi ruhiy ustunlik Maksim Skavish tomoniga o‘tdi.
Jasur Yaxshiboev gollarining 9 tasini sobiq jamoasi – “Energetik-BGU” tarkibida kiritgan edi. “Shaxtyor”ga o‘tganidan keyin sakkizta bahsda raqiblar darvozasini to‘rt marotaba aniq nishonga oldi. Maksim Skavish esa birinchi davra o‘yinlarida borisovliklarning uchta goliga muallif qildi. Hech kim uning to‘purarlar raqobatiga suqulib kirishini kutmagan edi. Lekin chempionatning ikkinchi yarmida o‘nta gol urgan holda to‘purarlik uchun kurashayotgan ko‘p hujumchilarni ortda qoldirib, Jasur Yaxshiboevga etib oldi.
Demak, yana bir qizg‘in raqobatga guvoh bo‘lamiz. Jasur Yaxshiboev legioner maqomida to‘p tepayotgan ilk mavsumida tarixiy natija qayd etib, Belarus chempionatining eng zo‘r to‘purari bo‘la oladimi? Bu savolning javobi Jasur chempionatning qolgan o‘yinlarida qancha gol ura olishida!
“Shaxtyor” – “Dinamo-Minsk” uchrashuvi Toshkent vaqti bilan 20:00da boshlanadi. Bu uchrashuvni Yaxshiboevning o‘zi sariq kartochkalari ko‘pligi tufayli o‘tkazib yuboradi.