317-ші Қара пайым-сөз: Қазақтың «Тоғыс есебі» күнтізбесін елімізге ендіруге кімдер кедергі келтіріп отыр?

Бүгін (06.10.2020 жыл) жариялаған «Тоғыс есебі – мың жыл өтсе де мүлтіксіз жұмыс істеп тұр» деген жазбама жаппай лайк қойып, өз пікірлеріңізді білдіріпсіздер. Сіздерге айтар алғысым шексіз. Өткен 2019 жылдың басында ҚР Үкіметіне хат жазып, осы өздеріңіз риза болып отырған «Тоғыс есебін» өздерінің ұлттық күнтізбесін ұстанып отырған әлемнің 40 шақты елдері сияқты қазіргі христиандық григориан күнтізбесіне жанама түрде енгізейік деген ұсыныс жасаған едім. Оған қазақтың ғылыми ошақтары мен ресми ғалымдарының не деп жауап қатқанын төменде жариялап отырмын. Уақыттарыңыз болса оқығандарыңыз дұрыс болар еді. Әуелі осы жазбаларды жазуға не себепші болғанын қысқаша баяндауды жөн көріп отырмын: «Қазақтың Алмагүл Меңлібаева деген суретші қызы бар. Ол өз туындыларында модернизм, символизм, акмеизм, футуризм және медиа-өнер элементтері бар графикалық дизайнды қолданады. Оның картиналары Милан, Берлин, Париж, Сидней, Амстерам және т.б. әлемнің ең ірі галереяларында ілініп, туындыларының алды 100 мың АҚШ долларына сатылғаны белгілі. Осы қарындасымның көшпенділер мен шығыс халықтарының мәдениетін жанын сала жаңа дәуірдің модернистік стилімен насихаттап жүретініне риза болып жүретін едім. Бірақ осы суретші қыз мені танымаса да «Academia.edu» веб-сайтындағы «Kazakh National Calendar» (Қазақтың Ұлттық күнтізбесі) атты кітапшама «Thank you for your work, very interesting! Regards, Almagul Menlibayeva» (Спасибо вам за вашу работу, очень интересно! С уважением, Алмагуль Менлибаева) деп пікір қалдырыпты». Бұл суретші қыздың пікірі мен төмендегі ғалымдардың пікірін өзара салыстырып, түйін жасауды Сіздерге қалдырамын.