Նախագահ. պետնախարարի պաշտոնը կհամատեղի նախարարներից մեկը

Հնարավոր է, Արցախի պետական նախարարի պաշտոնը համատեղի նախարարներից մեկը, այս մասին հայտնել է Արցախի նախագահ Արայիկ Հարությունյանը պաշտոնավարման 100 օրվա կապակցությամբ տեղի ունեցած մամլո ասուլիսին: Ըստ նրա` դրա համար հարկավոր են որոշակի փոփոխություններ սահմանադրության մեջ: artsakhnow.am-ը վաղուց ուներ տեղեկություն, որ պետնախարարի հաստիքը, հնարավոր է կրճատվի: Այս մասին օրեր առաջ հարց էինք ուղղել նախագահի աշխատակազմի տեղեկատվության գլխավոր վարչության պետ Վահրամ Պողոսյանին, որը նշել էր, որ նման հարց այս պահին չի քննարկվում, հետևաբար լուրն իրականությանը չի համապատասխանում: Պետնախարարի հաստիքի կրճատման մասին «Ազատ Հայրենիք-ՔՄԴ» դաշինքի ներկայացուցիչներ, խմբակցության ղեկավար Արթուր Հարությունյանը և հանձնաժողովի նախագահ Արամ Հարությունյանը ևս նշել էին, որ նման քննարկումներից տեղյակ չեն: Նրանք ոչինչ չէին ասել նաև պաշտոնի համատեղման հնարավորության մասին:

Պետական նախարարի պաշտոնը Արցախի պետական համակարգ է ներմուծվել 2017թ. սահմանադրական փոփոխություններից հետո, երբ նոր սահմանադրությամբ վերացվեց վարչապետի պաշտոնը: Պետական նախարարը, ի տարբերություն վարչապետի, ոչ թե կառավարության ղեկավարն է, այլ ուղղակի կառավարության անդամ է, Պետական նախարարը համակարգում է այն նախարարների գործունեությունը, որոնք սահմանվում են Հանրապետության նախագահի կողմից: 2017թ. սեպտեմբերից մինչև 2018թ. հունիս պետական նախարարի պաշտոնը զբաղեցնում էր Արայիկ Հարությունյանը, նրանից հետո` Գրիգորի Մարտիրոսյանը:

http://www.artsakhnow.am/%d5%ba%d5%a5%d5%bf%d5%b6%d5%a1%d5%ad%d5%a1%d6%80%d5%a1%d6%80%d5%ab-%d5%ba%d5%a1%d5%b7%d5%bf%d5%b8%d5%b6%d5%a8-%d5%af%d5%b0%d5%a1%d5%b4%d5%a1%d5%bf%d5%a5%d5%b2%d5%ab-%d5%b6%d5%a1%d5%ad%d5%a1%d6%80/